Prezıdent «Báıterek» ulttyq basqarýshy holdıńi» AQ basqarma tóraǵasy Rýstam Qaraǵoıshındi qabyldady, dep habarlaıdy almaty-akshamy.kz
Memleket basshysyna holdıńtiń byltyrǵy atqarǵan jumystarynyń nátıjeleri men bıylǵy qyzmetiniń strategıalyq baǵyttaryn iske asyrý jospary jóninde esep berildi
Rýstam Qaraǵoıshınniń aıtýynsha, «Báıterektiń» bıznesti qoldaý isine qosqan jalpy úlesi shamamen 2,5 trıllıon teńgeni quraıdy. Kompanıa ekonomıkanyń ornyqty ári sapaly damýyn qamtamasyz etý úshin aýyl sharýashylyǵy, óńdeý ónerkásibi, ınfraqurylym, kólik jáne logıstıka, sondaı-aq turǵyn úı qurylysy sıaqty perspektıvti salalarǵa basymdyq berip, olardy keshendi túrde qarjylandyrýǵa kúsh salýǵa nıetti.
Sonymen qatar Prezıdentke kompanıanyń básekege qabiletti kásipkerlerdi qoldaýǵa baǵyttalǵan jospary týraly baıandaldy. Basty maqsat – Qazaqstannyń barlyq óńirinde shaǵyn, orta jáne iri bıznes jobalaryn qarjylandyrý kólemin ulǵaıtý. Shaǵyn jáne orta bıznes baǵyty boıynsha shaǵyn jáne monoqalalardaǵy, sondaı-aq aýyldardaǵy kásipkerlerge belsendi qoldaý kórsetiledi.
Memleket basshysy atalǵan baǵyttardaǵy jumysty jandandyrý mańyzdy ekenin atap ótip, júktelgen mindetterdiń josparly oryndalýy elimizdiń ekonomıkasyn nyǵaıtýǵa jáne azamattardyń ál-aýqatyn arttyrýǵa aıtarlyqtaı múmkindik beretinin aıtty.