Memleket basshysyna kompanıanyń bıylǵy birinshi toqsanda atqarǵan operasıalyq jáne qarjylyq qyzmetiniń nátıjeleri týraly esep berildi.
Prezıdentke «QazMunaıGazdyń» kóptegen negizgi kórsetkishter boıynsha byltyrǵy osy kezeńmen salystyrǵanda ósimge qol jetkizgeni jóninde baıandaldy, dep habarlaıdy Almaty-akshamy.kz Aqordanyń resmı saıtyna silteme jasap.
Asqat Hasenov iri ınvestısıalyq jobalardyń, sonyń ishinde Jańaózende gıbrıdti elektr stansıasyn jáne Atyraý oblysynda qýaty 1,25 mıllıon tonna bolatyn polıetılen óndirý zaýytyn salý, munaı-hımıa klasterin damytý, Kaspıı teńizindegi Qalamqas-teńiz, Hazar jáne Áýezov ken oryndaryn ıgerý barysy jaıynda aıtty.
Prezıdentke kompanıanyń 2023 jyly iske qosylǵan gaz ken oryndary, sondaı-aq qorlardy toltyrý jáne munaı óndirý deńgeıin saqtaý maqsatynda júrgizilip jatqan geologıalyq barlaý jumystary týraly málimet berildi. Atap aıtqanda, «QazMunaıGaz» Qyzylorda oblysyndaǵy Torǵaı paleozoı ýchaskesinde tereńdigi 5 500 metr uńǵyma jáne Kaspıı teńizindegi Abaı ýchaskesinde burǵylaý jumystaryn júrgizýdi kózdeıdi.
Budan bólek, Memleket basshysyna áleýmettik jobalardyń júzege asyrylýy jáne kompanıanyń sý tasqynyna qarsy is-sharalarǵa qatysty atqarǵan jumystary týraly aıtyldy.
Kezdesý sońynda Qasym-Jomart Toqaev geologıalyq barlaý, munaı-gaz hımıasy salalaryndaǵy jobalarǵa iri ınvestorlardy tartý jóninde birqatar tapsyrma berdi. Sondaı-aq otandyq munaı óńdeý zaýyttarynyń úzdiksiz jumysyn qamtamasyz etý qajet ekenine erekshe nazar aýdardy.