Pedagogter úshin eń mańyzdy áleýmettik kepildikterdiń biri - jyl saıynǵy aqyly eńbek demalysyna shyǵý ýaqytynyń uzaqtyǵyn belgileý.
Onyń uzaqtyǵy barlyq pedagog úshin 56 kúntizbelik kúndi quraıdy, dep habarlaıdy Almaty-akshamy.kz QR Oqý-aǵartý mınıstrliginiń baspasóz qyzmeti.
Pedagogterge jyl saıynǵy aqyly eńbek demalysynyń 2 túri beriledi: negizgi jáne qosymsha.
Qosymsha demalys ekologıalyq qolaısyz jáne radıasıalyq qaýpi bar aýmaqtarda turatyn pedagogter úshin qarastyrylǵan. Onyń ishinde ekologıalyq qolaısyz aýmaqtarda turatyn pedagogter úshin qosymsha demalystyń uzaqtyǵy 7 kúnnen 12 kúnge deıingi, al radıasıalyq qaýipti aýmaqtarda turatyn pedagogter úshin 5 kúnnen 14 kúnge deıingi merzimdi quraıdy. Demalys ýaqytyna túsken mereke kúnderi eńbek demalysyna kirmeıdi. Eńbek demalysyn berý kezinde naqty jumys istegen ýaqyt qana esepke alynady.
«Eńbek demalysyn berý kezinde saýyqtyrýǵa arnalǵan járdemaqy laýazymdyq jalaqy mólsherinde tólenedi. Saýyqtyrý járdemaqysynyń mólsherin esepteý pedagogtiń demalys berilgen kúngi naqty júktemesin eskere otyryp, laýazymdyq aqy mólsherinde júrgiziledi, munda qosymsha aqylar men ústemeaqylar eseptelmeıdi», - deıdi Búdjettik josparlaý departamentiniń Eńbekaqy tóleý ádisnamasy basqarmasy basshysy Gúlaıym Toqpanova.
Pedagog qosymsha jumysty nemese ýaqytsha bolmaǵan qyzmetkerdiń mindetterin óziniń negizgi jumysynan bosatylmaı oryndaǵan jaǵdaıda bul laýazymdardy qatar atqarý bolyp tabylady. Bul jaǵdaıda saýyqtyrýǵa arnalǵan járdemaqy pedagogke negizgi laýazymy boıynsha ǵana tólenedi.
Eger pedagog qosymsha jumysty laýazymdardy qosa atqarý týraly jeke eńbek sharty boıynsha negizgi jumystan bos ýaqytynda atqarsa, saýyqtyrýǵa arnalǵan járdemaqy negizgi jumys úshin de, qosymsha jumys úshin de bólek tólenýi tıis.