Memleket basshysy jáne Elbasynyń qatysýymen Táýelsizdiktiń 30 jyldyq mereıtoıyna arnalǵan saltanatty jıyn ótti
Memleket basshysy Qasym-Jomart Toqaev pen Elbasy Nursultan Nazarbaev el Táýelsizdiginiń 30 jyldyq mereıtoıyna oraı «Astana Opera» opera jáne balet teatrynyń ǵımaratynda ótken saltanatty is-sharaǵa qatysty, dep habarlaıdy Almaty-akshamy.kz Aqordanyń resmı saıtyna silteme jasap.
Qazaqstan Prezıdenti barsha qazaqstandyqtardy el Táýelsizdiginiń mereıtoıymen quttyqtap, jınalǵan qaýym aldynda sóz sóıledi.
Qasym-Jomart Toqaev sóılegen sózinde Qazaq memlekettiliginiń ǵasyrlar boıǵy tarıhynyń eń mańyzdy kezeńderine, Táýelsizdik alǵan sátten bastap Qazaqstannyń áleýmettik-ekonomıkalyq, syrtqy saıası, mádenı, ǵylymı salalardaǵy mańyzdy jetistikterine nazar aýdardy. Tuńǵysh Prezıdent – Elbasy Nursultan Nazarbaevtyń Egemen Qazaqstandy qurý isindegi eren eńbegine arnaıy toqtaldy.
«Táýelsizdiktiń otyz jyly – tutas bir dáýir. Bul – qıyndyqtar men synaqtardy tabandy túrde eńserý dáýiri, tar jol, taıǵaq keshýmen salystyrýǵa bolatyn uzaq kezeń. Bul – halqymyzdyń tarıhynda betburys bolǵan jasampazdyq dáýiri. Sondyqtan el azamattarynyń atynan Nursultan Ábishuly Nazarbaevqa táýelsiz Qazaqstandy qurýdaǵy eren eńbegi úshin shyn júrekten alǵys aıtamyn», – dedi Memleket basshysy.
Qasym-Jomart Toqaev Táýelsizdikti nyǵaıtýǵa úles qosqan barsha otandasymyzǵa alǵys aıtty.
«Eńseli el bolýymyzǵa barlyq salanyń, túrli mamandyqtyń ókilderi jáne barsha azamattarymyz bir kisideı atsalysty. Túptep kelgende, Táýelsizdikti nyǵaıtý degenimiz – elge paıdasy tıetin naqty jumystardy júzege asyrý. Qazaqstan sizderdiń jasampaz eńbekterińizdiń arqasynda zor jetistikke jetti. Men osy mereıli sátte Táýelsizdigimizdi nyǵaıtýǵa qosqan úlesi úshin dúıim jurtqa alǵys aıtamyn», – dedi Prezıdent.
Prezıdent aldaǵy kezeńge arnalǵan josparlar týraly aıta kele, elimizdi odan ári damytýdyń basym mindetterine toqtaldy.
«Endi aldymyzda bolashaqtyń ekonomıkasyn jedel qurý mindeti tur. Onyń negizin jańa tehnologıalar, jasandy ıntellekt, joǵary eńbek ónimdiligi jáne shyǵarmashylyq bastama quraıdy. Bul jumystardy atqarýda jastar sheshýshi ról atqarýy kerek. Memleket qoǵamdaǵy konstrýktıvti dıalog pen yntymaqtastyqty maqsatty túrde damyta otyryp, árqashan jaýapty azamattarǵa arqa súıeıdi. Biz dáıekti saıası jańǵyrý úderisin jalǵastyra beremiz, biraq áleýmettik antagonızmge, popýlızmge, ishki jaǵdaıdyń turaqsyzdanýyna jol bermeımiz. Elimizde úılesim men tártiptiń berik arqaýy retinde zań ústem qurýǵa tıis. Ekologıany jaqsartý aldaǵy onjyldyqtaǵy memlekettik saıasattyń negizgi basymdyǵy bolady. Qazaqstan sıfrlyq tehnologıany engizý isin jan-jaqty kúsheıtedi. Biz qoǵamda iskerlik rýhy men tájirıbesin odan ári kúsheıtýdi sózben emes, jasampaz ulttyń dańqyn asyra otyryp ispen kórsetýimiz kerek», – dedi Memleket basshysy.
Qasym-Jomart Toqaev sóziniń sońynda minberge QR Tuńǵysh Prezıdenti – Elbasy Nursultan Nazarbaevty shaqyrdy.
Saltanatty jıyn merekelik konsertke ulasty.