Almatyda Jeltoqsan kóterilisiniń qyr-syryn baıandaıtyn Talǵat Aıtbaıulynyń jańa kitabynyń tusaýkeseri ótti, dep habarlaıdy Almaty-aqshamy.kz.
Táýelsizdik kúniniń qarsańynda A.P.Chehov atyndaǵy qalalyq kitaphanada pýblısıs-jazýshy Talǵat Aıtbaıulynyń «Almaty: 1986 jeltoqsan» aıǵaq-kitabynyń 6-10 tomdarynyń tusaýkeser rásimi ótti.
Óziniń tarıhı mán-mazmunyna qaraı 1986 jylǵy Jeltoqsan oqıǵasy – qazaq halqynyń ómirinde buryn-sońdy bolmaǵan eń aýyr ári erekshe qasterli oqıǵalardyń biri. Óıtkeni sol kúnderi alańǵa shyqqan aǵalarymyz ben apaılarymyzdyń arqasynda biz ata-babalarymyz ǵasyrlar boıy armandaǵan táýelsizdikke qol jetkizdik. Atalmysh kitapta sol zulmat kezeńdi arqaý etken, oblystyq, jergilikti gazetterde jarıalanǵan, jekelegen respýblıkalyq basylymdarda jaryq kórgen dúnıeler jınaqtalǵan. Tarıhshy ǵalymdar sóz alady, Jeltoqsan aqıqatyn ashý úshin qurylǵan Komısıa quramynda jumys istegen zańger-ǵalym óz oıyn ortaǵa salady. Jalpy, áli kúnge deıin saıası, tarıhı baǵasyn ala almaı kele jatqan kóterilistiń ashylýǵa tıisti qaltarystaryn alǵa tartady.
Aıǵaq-kitap Almaty qalasy ákimdiginiń qoldaýymen 100 dana bolyp basylyp shyqty. Olardyń basym kópshiligi jeltoqsanshylarǵa tartý etilip, qalǵany qala kitaphanalarynyń sórelerinen tabylmaq.
«Jeltoqsan kóterilisi qazaq tarıhynda aıryqsha oryn alatyn úlken oqıǵa, ult azattyq kóterilis. 1986 jyldyń jeltoqsanynda úsh kúnde bolǵan oqıǵa taýsylmaıtyn tarıh, taýsylmaıtyn taqyryp. Biz sonyń shetin ǵana mújip júrmiz-aý dep oılaımyn. Aıtylmaǵan qupıalary qatpar-qatpar. Men sonyń bir ushyn ǵana shyǵardym dep oılaımyn. Almaty qalalyq ákimdigine myń alǵys!» - dep oıymen bólisti avtor.
Talǵat Aıtbaıuly «Almaty: 1986 jeltoqsan» kitabyn jazýdy 1990 jyldan bastasa, bir kitaptyń aınalasynda júrgenine 31 jyl tolypty. Avtordyń aıtýynsha, sońǵy derekter men anyqtalǵan aqıqattarǵa oraı buǵan deıin «oqıǵa» atalyp kelgen tarıhı sáttiń «kóterilis» dep atalýyna tolyqtaı negiz bar. Sondyqtan pýblısıs-jazýshy bes jyl buryn alǵash ret «Jeltoqsan kóterilisi» degen atpen eki tom kitap shyǵarǵan. Qazir sol kitaptyń 3-tomy basylyp jatyr eken.
Tusaýkeser jıynyna jeltoqsanshylar men qoǵam qaıratkerleri, qoǵamdyq birlestikterdiń basshylary qatysty. Olardyń qatarynda QR Mádenıet qaıratkeri Mahmut Qulmentegi, «Jeltoqsan zeınetkerleri» qoǵamdyq birlestiginiń tóraǵasy Talǵat Qojanadırov, sazger, aqyn Baýyrjan Shuǵyl, «Táýelsizdik - 1986 Jeltoqsan» qoǵamdyq birlestiginiń tóraǵasy Baqyt Baınıazov, etnograf, jazýshy Danıar Álbozym bar.
Qonaqtar kitap avtoryn tusaýkesermen quttyqtap, jyly lebizderin bildirdi. Qashanda Táýelsizdikti sóz etkende, esimizge áýelden 1986 jyldyń yzǵary túseri sózsiz. Sondaı tarıhı oqıǵalar baıandalatyn kitaptardyń jazyla túsýi tarıhtyń qarańǵy betterine sáýle túsirip, aqıqatqa bir taban jaqyndatady. Sondyqtan bul kitaptyń mańyzy men orny bólek ekeni sózsiz.
Almatylyqtar tarıhı kitapty qalalyq kitaphanalardan oqı alady.