Qazaqstan Prezıdenti Qasym-Jomart Toqaev Shanhaı yntymaqtastyq uıymyna (SHYU) múshe memleketterdiń Syrtqy ister mınıstrlerimen kezdesý barysynda kıberqaýipsizdik pen turaqty damý máselelerin kóterdi, dep habarlaıdy almaty-akshamy.kz. Aqordanyń baspasóz qyzmetine silteme jasap.
Kezdesý barysynda Toqaev kıberqaýipterdi erte anyqtaý jáne SHYU elderiniń aqparattyq ınfraqurylymynyń turaqty jumysyn qamtamasyz etý tetikterin ázirleýdiń mańyzdylyǵyn atap ótti.
«Aýǵanstandaǵy jaǵdaı jiti nazar aýdarýdy qajet etedi. Bul elde gýmanıtarlyq daǵdarystyń aldyn alý jáne uzaqmerzimdi turaqtylyqqa jaǵdaı jasaý úshin kúsh biriktirý jumystaryn jalǵastyrǵan jón. Almatyda Ortalyq Azıa men Aýǵanstan úshin ornyqty damý maqsattary jónindegi BUU-nyń óńirlik ortalyǵyn qurý týraly Qazaqstannyń bastamasyn qoldaý – óte ózekti», - dedi Toqaev.
Prezıdent klımattyń ózgerýi máselesine de aıryqsha nazar aýdarýdy usyndy. Ol aldyn alý sharalaryn shuǵyl qabyldamasaq, bul másele jahandyq tabıǵat apattaryn asqyndyrýy múmkin ekenin eskertti.
«Aýa raıynyń asa qubylmaly bolýy álemdegi basty problemalardyń birine aınalyp keledi. Osyǵan baılanysty SHYU tabıǵat apattarymen kúresý isindegi tásilderin jańartýy qajet. Bıyl kóktemde bizdiń elimiz klımat ózgeristeriniń keri áserin anyq sezindi. Osy múmkindikti paıdalana otyryp, Qazaqstandaǵy alapat sý tasqyny kezinde tileýlestik tanytyp, kómek kórsetkeni úshin sizderdiń elderińizge shynaıy alǵysymdy bildirgim keledi. Biz bul qoldaýdy joǵary baǵalaımyz», - dedi Qasym-Jomart Toqaev.
Sonymen qatar, Prezıdent SHYU-nyń aldaǵy Astana samıti «Kópjaqty dıalogty nyǵaıtý – ornyqty beıbitshilik pen damýǵa umtylý» taqyrybyna arnalatynyn málimdedi.
«Shanhaı uıymynyń negizgi maqsattarynyń biri – aımaqtaǵy beıbitshilikti, qaýipsizdik pen turaqty damýdy qamtamasyz etý. Muny atalǵan kún tártibi anyq kórsetedi. Osy oraıda Syrtqy ister mınıstrleri keńesine úlken úmit artylady. Sizderdiń jumystaryńyzdyń nátıjesi SHYU-ǵa múshe memleketter basshylary keńesiniń Astanadaǵy otyrysyn tabysty ótkizýge yqpal etetinine senimdimin», - dedi Qazaqstan Prezıdenti.