İİM Almaty akademıasynyń 60 tyńdaýshysy naýqas balalarǵa donor boldy.
QR İİM M.Esbolatov atyndaǵy Almaty akademıasynyń alǵashqy kásibı daıarlyq tyńdaýshylary tańerteńnen bastap naýqas balalardy, sonyń ishinde jol-kólik oqıǵalarynan zardap shekken balalardyń emderi úshin qan tapsyrýǵa qalalyq qan ortalyǵyna keldi, dep habarlaıdy Almaty-akshamy.kz Polisia.kz-ke silteme jasap.
Osylaısha, olar JKO jáne basqa da kúrdeli jaǵdaılarda zardap shekken balalarǵa kómek kórsetip, qoldaý maqsatynda Qazaqstandaǵy qan donorlarynyń qataryn tolyqtyrdy.
"Bizdiń polısıanyń tájirıbesinde muqtaj adamdarǵa qan tapsyrý keńinen qoldanylady. Ásirese, eger bul bizdiń balalarymyzǵa qatysty bolsa. Polıseıler kún saıyn ártúrli oqıǵalarǵa tap bolady jáne zardap shekkenderge alǵashqy medısınalyq kómek kórsetedi, sondyqtan olar qajetti kómek pen qoldaýdyń qanshalyqty mańyzdy ekenin jaqsy biledi. Biz bul aksıany balalardy qorǵaý kúnine oraılastyrdyq. Osyndaı bastama kóterip, qyzmettik jáne azamattyq boryshyn júzege asyrǵan tyńdaýshylarymyzdy maqtan tutamyz", – dep bólisti Qazaqstan Respýblıkasy İİM M.Esbolatov atyndaǵy Almaty akademıasy bastyǵynyń orynbasary Janat Dilbarhanova.
Kelesi kezeńde, osy qaıyrymdylyq aksıasyna akademıanyń qalǵan 200-ge jýyq tyńdaýshysy qatysady dep josparlandy, olar da donor bolýǵa nıet bildirdi.