Prezıdent Qasym-Jomart Toqaev Saýd Arabıasy Koróldiginiń Investısıa mınıstri Halıd Ál-Falıhti qabyldady
Qasym-Jomart Toqaev Halıd Ál-Falıhtiń sapary Saýd Arabıasy Koróldiginiń taq murageri Muhammed ben Salman ál-Saýdımen telefon arqyly bolǵan mazmundy áńgimelesýdiń jalǵasy ekenin atap ótti, dep habarlaıdy Almaty-akshamy.kz Aqordanyń resmı saıtyna silteme jasap.
Memleket basshysy Qazaqstanǵa 30 jyldan beri kórsetip kele jatqan qoldaýy úshin Saýd Arabıasyna rızashylyǵyn bildirdi.
«Elderimiz arasyndaǵy yntymaqtastyqty ilgeriletý jáne onyń mánin tereńdete túsý úshin kóptegen múmkindik bar ekenine senimdimiz. Osy oraıda, Taq muragerimen telefon arqyly áńgimelesý kezinde bolashaqta qolǵa alynatyn birqatar jobany talqyladyq. Ózara is-qımyldarymyz tereńdeı túsedi. Elimizge jasaǵan saparyńyzǵa rızashylyǵymyzdy bildiremiz. Sizdiń qoldaýyńyzben jáne meniń Ákimshiligimniń jumys júrgizýimen ekijaqty baılanystarymyzdy shynaıy ilgeriletemiz dep oılaımyn», – dedi Qazaqstan Prezıdenti.
Óz kezeginde Halıd ál-Falıh Qasym-Jomart Toqaevqa qabyldaǵany úshin alǵys bildirip, Saýd Arabıasynyń Koroli Salman ben Ábdel Ázız ál-Saýdtyń jáne Koróldiktiń Taq murageriniń sálemderin jetkizdi.
«Olar Qazaqstanǵa odan ári órkendeý men ıgilik jolynda qoldaý kórsetýdi jalǵastyra beretinderin naqtylady. Qazaqstannyń júrgizip otyrǵan reformalary men Ortalyq Azıadaǵy kóshbasshylyǵyn, sonymen qatar 30 jyl buryn tańdaǵan biregeı jolyn joǵary baǵalaıdy. Osy ýaqyt aralyǵynda Qazaqstannyń Tuńǵysh Prezıdenti negizin qalaǵan syndarly saıasat ózińizdiń parasatty basshylyǵyńyzben jalǵasyp keledi», – dep atap ótti Saýd Arabıasynyń mınıstri.