Bıyl 26 zań jobasy ázirlenedi
Prezıdentke mınıstrliktiń byltyrǵy atqarǵan jumystarynyń nátıjeleri men 2022 jyly mán beriletin basym baǵyttar jóninde baıandaldy. Bıyl 26 zań jobasy ázirlenip, Parlament qaraýyna engiziledi dep josparlanýda.
Qasym-Jomart Toqaevqa memleket múddesiniń qazaqstandyq jáne halyqaralyq sottarda qorǵalýyn qamtamasyz etý jóninde málimet berildi, dep habarlaıdy Almaty-akshamy.kz Aqordaǵa silteme jasap.
Qazirgi ýaqytta mınıstrlik 25 is boıynsha memleket múddesin qorǵaý jumystaryn jalǵastyrýda. Atap aıtqanda, olardyń 14-i halyqaralyq arbıtrajdardyń, 5-eýi sheteldik sottardyń qaraýynda jatyr, 6 is sotqa deıingi óndiriste.
Sonymen qatar Qanat Mýsın sot aktileriniń oryndalýyna qatysty jaǵdaı men halyqqa zańger kómeginiń berilýi jóninde esep berdi. Ádilet mınıstriniń aıtýynsha, 122 myńnan astam azamat kepildendirilgen zań kómegin alǵan, osy maqsatta 1,8 mıllıard teńge bólingen. Áleýmettik jaǵdaıy tómen 11 myńnan astam adam zańger kómegin tegin alǵan.
Prezıdent Ádilet mınıstrliginiń 2022 jylǵa arnalǵan josparymen tanysqannan keıin ázirlenip jatqan normatıvtik-quqyqtyq aktilerdiń sapaly oryndalýyn qamtamasyz etýge, sondaı-aq azamattardyń quqyǵy men bostandyǵyn qorǵaýǵa baǵyttalǵan zańgerlik qyzmet kórsetý isine erekshe nazar aýdarýdy tapsyrdy.