ASHM sýbsıdıalaý júıesin reformalap, jańa tásilderdi engizbek.
Qazaqstandyq sharýalar jumyrtqa óndirý salasyndaǵy sýbsıdıa sanyn qysqartýǵa qarsy ekenin aıtty, dep habarlaıdy Almaty-akshamy.kz İnbusiness.kz saıtyna silteme jasap.
Jumyrtqa óndirýshileri qaýymdastyǵy baspasóz qyzmetiniń málimetinshe, Aýyl sharýashylyǵy mınıstrligi saladaǵy 47 sýbsıdıa túrin 20-ǵa deıin qysqartý kerek dep usynys jasaǵan.
Mınıstr Erbol Qarashókeevtiń pikirinshe, sýbsıdıanyń sanynan góri onyń sharýalarǵa qoljetimdiligi mańyzdy. Biraq otandyq sharýalar munymen kelispeıdi. Olar sýbsıdıa azaısa, sala shyǵynǵa batady degen pikirde. Jumyrtqa óndirýshileri qaýymdastyǵynyń ókili Aman Serikuly sýbsıdıalardyń alynyp tastalýy aýyr soqqy bolatynyn aıtady.
«Jumyrtqany sýbsıdıalaýdy alyp tastaý qus fabrıkalarynyń tabysynyń azaıýýyna ákeledi. Paıda tappaı, jumys isteý múmkin emes. Sondyqtan óndirýshiler jumyrtqa baǵasyn kóterýge májbúr bolady. Biraq qazir Qazaqstanda jumyrtqa ishki naryqta tutynylatyn kólemnen áldeqaıda kóp óndiriledi. Usynys suranystan asyp ketken jaǵdaıda baǵany kóterý múmkin emes. Sondyqtan fabrıkalar bankrot bolmas úshin, óndiris kólemin qysqartýǵa májbúr bolamyz», - dedi qaýymdastyq ókili.
Qazaqstan jumyrtqa óndirýshiler qaýymdastyǵynyń tóraǵasy Maksım Bojkonyń aıtýynsha, bıyl jumyrtqalaıtyn taýyqtar sanyn 10-20% qysqartý 300-600 jumys ornynyń qysqarýyna jáne óndiristiń 200-400 mln dana jumyrtqaǵa tómendeýine ákelýi múmkin. Bul tutynýshylardyń qaltasyna da áser etpeı qoımaıdy. Jumyrtqa óndirýshileri qaýymdastyǵynyń baǵalaýynsha, jumyrtqa 10-30% qymbattaýy yqtımal.