Memleket basshysyna Oljas Bektenov elimizdiń áleýmettik-ekonomıkalyq damý kórsetkishteri, egin oraǵy jáne jylytý maýsymyna daıyndyq barysy týraly aqparat berdi, dep habarlaıdy aqshamnews.kz.
Úkimet basshysy bıylǵy qańtar-tamyz aılary aralyǵynda ekonomıkanyń ósimi 3,7 paıyzdy quraǵanyn, qurylys (8,8%), kólik jáne qoıma isi (7,9%), baılanys (7,4%), saýda (5,5%), óńdeý ónerkásibi (4,9%) sektorlaryndaǵy kórsetkish edáýir jaqsarǵanyn aıtty.
Sonymen qatar, aýyl sharýashylyǵyn jeńildikpen qarjylandyrý kólemi 3 ese ulǵaıyp, 580 mıllıard teńgege jetken. Búginde elimiz boıynsha dándi jáne burshaqty daqyldar alqabynyń 70,2 paıyzy jınalyp, 17,2 mıllıon tonna astyq bastyrylǵan. Dıqandar arzan janar-jaǵarmaımen jetkilikti mólsherde qamtamasyz etilgenine toqtaldy.
Barlyq óńirde aldaǵy jylytý maýsymyna daıyndyq jumystary júrgizilip jatqany jóninde baıandady. Ásirese, áleýmettik nysandardyń daıyndyǵy joǵary deńgeıde ekenine toqtaldy. Turǵyn úılerdi jylytý maýsymyna ázirleý jumystary 98,3 paıyzǵa oryndalǵanyn jetkizdi. Elektr stansıalaryna jyl saıyn 60 mıllıon tonna kómir qajet. Qazir onyń qajetti qory bar ekenin aıtty.
Sý tasqyny saldaryn joıý jónindegi buǵan deıin berilgen tapsyrmalarynyń oryndalý barysy men kelesi jyly sý tasqyny jaǵdaıynyń aldyn alý sharalary týraly aıtty. Zardap shekkenderdiń barlyǵyna áleýmettik qoldaý kórsetilip, búlingen dúnıe-múlki úshin ótemaqy tólengen. Baspanasynan aıyrylǵandarǵa 5767 turǵyn úı satyp alyndy jáne 2576 jańa úı salynǵan. Aqmola men Batys Qazaqstan oblystaryndaǵy 104 nysanda jumys aıaqtalýǵa jaqyn. Sý tasqynyna qarsy is-sharalar jospary júzege asyrylyp jatqany týraly baıandady.
Memleket basshysy elimizdiń ónerkásip áleýetin odan ári arttyrý jáne ınfraqurylymdy jańǵyrtý jóninde birqatar tapsyrma berdi.