Qasym-Jomart Toqaev Parlamentaralyq odaqtyń prezıdenti Dýarte Pashekony qabyldady
Áńgimelesý barysynda Qazaqstannyń Parlamentaralyq odaqpen ózara yqpaldastyǵynyń mańyzdy baǵyttary talqylandy, dep habarlaıdy Almaty-akshamy.kz Akorda.kz-ke silteme jasap
Prezıdent Qasym-Jomart Toqaev Dýarte Pashekoǵa iltıpat bildire otyryp, Parlamentaralyq odaqpen aradaǵy yntymaqtastyqty nyǵaıtýǵa tyń serpin berý turǵysynan onyń elimizge jasaǵan saparynyń mańyzdylyǵyn atap ótti.
– Parlamentaralyq odaq parlamentaralyq baılanystardy damytý isinde mańyzdy ári jetekshi uıym sanalady. Sizdiń saparyńyz parlamenttik dıplomatıany keńeıtý turǵysynan saıası mańyzǵa ıe. Biz atalǵan Odaqpen ózara tyǵyz qarym-qatynastardy damytýǵa basa mán beremiz jáne osy mańyzdy uıymnyń tóraǵasy laýazymyndaǵy Sizdiń mısıańyzdy qoldaımyz, – dedi Memleket basshysy.
Qasym-Jomart Toqaev Dýarte Pashekoǵa elimizdegi demokratıalyq ınstıtýttardy jáne zań ústemdigin nyǵaıtýǵa, adam quqyǵy men genderlik teńdikti qamtamasyz etýge baǵyttalǵan aýqymdy saıası reformalardyń júzege asyrylýy jóninde aıtty. Sondaı-aq Memleket basshysy ony 2022 jyldyń qyrkúıek aıynda bolatyn Álemdik dinder kóshbasshylarynyń VII Sezine qatysýǵa shaqyrdy.
Óz kezeginde Dýarte Pasheko kezdesýge múmkindik bergeni úshin Qasym-Jomart Toqaevqa alǵys bildirip, Memleket basshysyn Qazaqstan Táýelsizdiginiń 30 jyldyǵymen quttyqtady. Sonymen qatar ol elimizdiń osy kezeńdegi ekonomıkalyq jáne dıplomatıalyq tabystaryn joǵary baǵalap, Qazaqstannyń memleketter men adamdar arasynda dıalog ornatýdyń jarqyn úlgisi bolyp otyrǵanyna nazar aýdardy.
Portýgalıa parlamentarıi Memleket basshysyna Parlamentaralyq odaqty damytýdyń aldaǵy kezeńdegi basymdyqtary týraly aıtty.
Sonymen qatar Qazaqstan men Portýgalıa qatynastaryn órkendetý aıasynda Nur-Sultan men Lıssabon arasyndaǵy yntymaqtastyqtyń qarqyndy damyp kele jatqany atap ótildi.