Kompanıanyń ónimderi tolyǵymen Qazaqstannyń ishki naryǵynda satylady
Memleket basshysy Qasym-Jomart Toqaev Aqmola oblysyna jumys sapary aıasynda Stepnogorsk qalasyndaǵy «Qazaqstannyń jylyjaı tehnologıalary» JSHS-ne bardy, dep habarlaıdy Almaty-akshamy.kz Aqordanyń resmı saıtyna silteme jasap.
Prezıdentke jylyjaı ónimderi – qıar, qyzanaq, burysh jáne basqa da kókónister men gúl ósirýdiń zamanaýı tehnologıalary tanystyryldy.
Jylyjaı kesheniniń jalpy aýdany – 5 gektar. Jobaǵa salynǵan ınvestısıanyń jalpy kólemi 4,8 mıllıard teńgeni quraıdy. 2023 jyly baklajan jáne qulpynaı ósirý bólimshelerin iske qosý josparlanyp otyr. Kompanıanyń ónimderi tolyǵymen Qazaqstannyń ishki naryǵynda satylady.
Óńir – aýyl sharýashylyǵy salasyndaǵy kóshbasshylardyń biri. Munda el boıynsha dándi daqyldardyń tórtten biri ósiriledi jáne úlken kólemde kókónister men qus eti óndiriledi.
Prezıdent óndiriletin ónimniń sapasyn baǵalap, onyń suranysqa ıe ekenin atap ótti. Sondaı-aq kompanıanyń eksporttyq múmkindikterine nazar aýdardy.
Memleket basshysy Aqmola oblysynyń aýyl sharýashylyǵy taýaryn óndirýshilerimen áńgimelesti. Kezdesý barysynda túıtkildi máseleler kóterilip, otandyq agroónerkásip keshenin damytýǵa qatysty konstrýktıvti usynystar aıtyldy.
Prezıdent jaǵdaıdy jiti qadaǵalaıtynyn, bıznes ahýaly týraly jedel aqparat alatynyn atap ótti. Sondaı-aq memleket otandyq kásipkerlerdi qoldaýdy jalǵastyratynyn jáne yntymaqtastyqtyń jańa formalary ázirlenetinin málimdedi.