UBT nátıjeleri boıynsha reıtıń jasalady
Prezıdent janyndaǵy Ortalyq komýnıkasıalar qyzmetinde Áskerı bilim jáne ǵylym departamentiniń bastyǵy, general-maıor Jumabek Ahmetovtiń qatysýymen Qorǵanys mınıstrliginiń brıfıńi ótti, dep habarlaıdy Almaty-akshamy.kz.
Qorǵanys vedomstvosynyń ókili jýrnalıserge vedomstvonyń oqý oryndaryna túsý erejelerin aıtyp berdi. Ol otandyq áskerı bilim berý júıesine magıstratýra jáne doktorantýra baǵdarlamalary boıynsha joǵary oqý ornynan keıingi daıarlaý júzege asyrylatyn Ulttyq qorǵanys ýnıversıteti, úsh áskerı joǵary oqý orny, eki kolej jáne Almaty, Shymkent jáne Qaraǵandydaǵy "Jas ulan" respýblıkalyq úsh mektebi kiretinin málimdedi.
Basshylyq mamandyqtary boıynsha kadrlardy Almaty qalasyndaǵy Qurlyq áskerleriniń áskerı ınstıtýty daıarlaıdy. Ushý jáne ınjenerlik-tehnıkalyq quramnyń mamandaryn Aqtóbe qalasyndaǵy Áýe qorǵanysy kúshteriniń áskerı ınstıtýty daıyndaıdy. Almaty qalasyndaǵy Radıoelektronıka jáne baılanys áskerı-ınjenerlik ınstıtýtynda radıotehnıkalyq mamandyqtardyń ofıser-ınjenerleri oqytylady.
General-maıor Jumabek Ahmetov qatysýshylardy áskerı ınstıtýttarǵa túsý kezeńderin habardar etti. 30 sáýirge deıingi merzimde jergilikti áskerı basqarý organy basshysynyń atyna ótinishter qabyldanady. Qujattar 15-20 shilde aralyǵynda qabyldanady.
Oqýǵa túsýge úmitkerler kásibı-psıhologıalyq irikteýden, medısınalyq kýálandyrýdan jáne dene shynyqtyrý deńgeıin tekserýden ótedi. Osy kórsetkishter jine UBT nátıjeleri boıynsha reıtıń jasalady. Sonyń negizinde qabyldaý komısıasy oqýǵa qabyldaıtyn bolady. Onyń sheshimi 6 tamyzda ýnıversıtettiń saıtynda jarıalanady.
Kórsetkishter birdeı bolǵan jaǵdaıda joǵary oqý ornyna túsýge "Jas ulan" respýblıkalyq mektepteriniń túlekteri, áskerı daıarlyq boıynsha qosymsha baǵdarlamalary bar bilim berý uıymdarynyń tárbıelenýshileri, qyzmet ótkerý kezeńinde qaza tapqan nemese múgedektik alǵan áskerı qyzmetshilerdiń balalary basym quqyqqa ıe bolady.
Qorǵanys mınıstrligi departamentiniń bastyǵy merzimdi áskerı qyzmet atqarǵan jáne qolbasshylyqtyń usynysyn alǵan azamattarǵa beriletin jeńildikterge nazar aýdardy. Osy sanattaǵylarǵa arnalǵan bastama bıylǵy jyldan bastalady.
Jańa erejeler boıynsha olar áskerı oqý oryndaryna emtıhansyz túsedi. Azamattardyń osy sanaty úshin áskerı joǵary oqý oryndaryna jyl saıynǵy qabyldaýdyń jalpy sanynyń 25%-yna kvota kózdelgen. Qabyldaý kezinde áskerı bólimderde júrgizilgen irikteýdiń nátıjeleri eskeriletin bolady.
Brıfıńte sondaı-aq, Shýchınsk qalasyndaǵy Shoqan Ýálıhanov atyndaǵy áskerı kolejge jáne Astana qalasyndaǵy Saǵadat Nurmaǵambetov atyndaǵy áskerı kolejge túsý sharttary túsindirildi. Oqý oryndarynda kelisimshart boıynsha áskerı qyzmet ótkerý úshin kishi komandalyq quramdy – kásibı serjanttardy daıarlaý júzege asyrylady.
Barlyq oqý kezeńinde kýrsanttar tolyq memleket tarapynan qamtylatyn bolady. Áleýmettik paketke aqshalaı qarajat, kıim-keshek, kúnine úsh ret tamaqtaný, tegin medısınalyq kómek jáne jataqhanada turý kiredi.