EXPO kórme alańynda bolashaq mamandardyń, jumys berýshiler men kásiptik-tehnıkalyq uıymdardyń basyn qosqan «Jumysshy mamandyqtarynyń qalasy» festıvali ótip jatyr. Bul – Memleket basshysy Qasym-Jomart Toqaevtyń bastamasymen jarıalanǵan «Jumysshy mamandyqtary jylyndaǵy» alǵashqy aýqymdy is-shara.
Festıvál Oqý-aǵartý mınıstrliginiń uıymdastyrýymen jáne basqa da salalyq vedomstvolardyń, ulttyq kompanıalar men iri kásiporyndardyń qoldaýymen ótip jatyr. Qalashyqtaǵy 40 ınteraktıvti kórmede 200-den astam mamandyqtyń qyr-syryna qanyǵyp, ekonomıka sektorlarynyń erekshelikterimen tanysýǵa bolady. Festıvál aıasynda birneshe kún boıy túrli semınarlar, sheberlik saǵattary, ınovasıalyq sesıalar men jumys jármeńkeleri uıymdastyrylady. Alǵashqy eki kúnde is-sharaǵa 15 myńnan astam adam kelgen.
Qasym-Jomart Toqaev energetıka, taý-ken, metalýrgıa, munaı-gaz, qurylys, aýyl sharýashylyǵy jáne taǵy da basqa salalarǵa maman daıarlaý úderisimen tanysty. Sondaı-aq Prezıdentke eńbek naryǵyndaǵy suranysqa jáne ár óńirdiń ereksheligine qaraı kásiptik-tehnıkalyq bilim berý uıymdaryn transformasıalaý mysaldary baıandaldy.
Prezıdent atom elektr stansasy sekildi iri jobalardy júzege asyrý qarsańynda sapaly bilim men kásibı daǵdyny meńgergen mamandar óte qajet ekenin aıtty.