1500-den astam áskerı qyzmetshi alǵash ret sekirdi.
Parashútpen sekirý – desantshylardyń jaýyngerlik daıyndyǵynyń mańyzdy elementi. Sońǵy eki aıdyń ózinde áskerı-kóliktik avıasıanyń S-295 ushaqtarymen jáne armıalyq avıasıanyń Mı-17 tikushaqtarymen qazaqstandyq desantshylar 800 metr bıiktikten 3000-nan asa márte sekirýdi oryndady, dep habarlaıdy aqshamnews.kz.
Alǵashqylardyń qatarynda Keńes Odaǵynyń Batyry general-maıor Ivan Panfılov atyndaǵy 37-shi desanttyq-shabýyldaý brıgadasynyń 8 arý jaýyngeri bar. Brıgada komandıri polkovnık Almas Tólegenov olardy alǵashqy sekirý jattyǵýyn oryndaýymen quttyqtady.
– Áýede alǵashqy qadamdaryn jasap, boıdaǵy qorqynyshty jeńip, naǵyz desantshymyn deı alasyńdar. Men batyldyqpen jáne qushtarlyqpen sekirý úshin daıyndyqtan ótip, normatıvterdi tapsyrǵan qyzdarymyzdy maqtan tutamyn, – dep atap polkovnık Almas Tólegenov.
Sekirýge daıyndyq eki aptaǵa sozyldy. Parashútshilerge úıretetin birinshi nárse 4 serıaly D-6 parashút júıesiniń taktıkalyq jáne tehnıkalyq sıpattamalaryn jáne quramdas bólikterin bilý, sekirý úshin parashútti óz betinshe oraý jáne aspanda oryn alýy yqtımal shtattan tys jaǵdaılarda durys áreket etý. Bunyń bári brıgadalardyń áýe-desanttyq keshenderiniń trenajerlarynda pysyqtalady.
– Brıgadada qyzmet etip júrgenime bir jyldan asty. Parashútpen sekirýge uzaq ýaqyt daıyndaldym. Árıne, basynda qorqynysh boldy, degenmen talaı márte sekirip júrgen tájirıbeli áriptesterim bizdi bortta jigerlendirip, keńesterin aıtty. Al bort esigin ashqan nusqaýshy «desant túsýge daıyndalyńdar» pármenin bergende, barlyq emosıalar joǵalyp, sekirýge degen qushtarlyq paıda boldy, – dedi alǵan áserin bólise aǵa maman kishi serjant Gúlzaráma Abdrıshıtova.
Dál sol kúni – asa kúrdeli ári jaýapty kezeńde áýede 1500-den 2000 metrge deıingi bıiktikten 15-20 sekýnd kidirispen 47 ofıser men kelisimshart boıynsha áskerı qyzmetshisi bar Desanttyq-shabýyldaý áskerleriniń sporttyq-parashúttik komandasy parashútpen sekirý jattyǵýlaryn oryndady.
Sekirý tapsyrmalaryn sátti oryndaý tek batyldyq pen erik-jigerdi ǵana emes, sondaı-aq barlyq erejelerdi, jınaqylyqty, asqan sheberlikti naqty oryndaýdy talap etetinin aıta ketken jón.