Almaty oblysy polısıa departamentiniń uıymdasqan qylmysqa qarsy kúres basqarmasy Talǵar aýdanynda qorqytyp alýmen jáne tonaýmen aınalysqan qylmystyq toptyń áreketine tosqaýyl qoıdy.
Tergeý barysynda belgili bolǵandaı, qylmystyq sqemanyń uıymdastyrýshysy – Qaınazar aýylynyń 19 jastaǵy turǵyny, dep habarlaıdy aqshamnews.kz Polisia.kz-ke silteme jasap.
Ol óz sybaılastarymen birge qurbandaryn áleýmettik jeli arqyly izdep, olardy qıturqy áreketke túsirgen.
Qylmystyq toptyń quramynda 17 jastaǵy qyz bolǵan. Ol qurbandarymen tanysyp, kezdesýge usynys jasap, olardyń senimine kirgen. Alaıda birer ýaqyttan soń kenetten ózin "aǵalarymyz" dep tanystyrǵan bir top jas jigit kelip, jábirlenýshini qorqyta bastaǵan. Qaskóıler jalǵan aıyp taǵyp, jynystyq qatynasqa qatysty aıyptaýlar arqyly aqsha talap etken. Keı jaǵdaılarda kúsh qoldanýdan da taıynbaǵan.
Olar jábirlenýshilerdiń baǵaly zattary men qujattaryn tartyp alyp, qomaqty qarajat aýdarýǵa májbúrlegen. Osylaısha 6 aqpanda qylmystyq toptyń qurbany 24 jastaǵy Almaty qalasynyń turǵyny bolǵan. Ony bopsalaýshylar kúshtep ustap, jeke qujattary men kólik qujattaryn tartyp alǵan. Sondaı-aq 100 000 teńge aýdarýdy talap etken. Buǵan qosa olar jábirlenýshini qorqytyp, taǵy 1 400 000 teńge berýge májbúrlemek bolǵan.
– Jedel-izdestirý is-sharalary barysynda polısıa qyzmetkerleri qylmystyq toptyń barlyq múshelerin anyqtap, ustady. Olardyń ústinen qorqytyp alý faktisi boıynsha qylmystyq is qozǵaldy. Jalpy sany jeti adam polısıaǵa jetkizildi, onyń tórteýi negizgi kúdikti retinde ýaqytsha ustaý ızolátoryna qamaldy. Qazirgi tańda tergeý jalǵasyp, olardyń ózge de qylmystarǵa qatysy bar-joǵy anyqtalýda, – dep habarlady oblystyq polısıa ókilderi.
Quqyq qorǵaý organdary qylmystyq toptyń ózge de qurbandary bolýy múmkin ekenin joqqa shyǵarmaıdy. Osyǵan baılanysty zardap shekkender bolsa, polısıaǵa habarlasýyn suraıdy. Tergeý amaldary jalǵasýda.