Prezıdent bastamalaryn Úkimet qalaı júzege asyrýda?

14 naýryzda Býrabaıda ótken Ulttyq quryltaıdyń IV otyrysynda Memleket basshysy Qasym-Jomart Toqaev qoǵamda qyzý talqylanǵan máselelerge qatysty pikir aıtty. Sondaı-aq, áleýmettik-ekonomıka­lyq, salyq saıasaty, ıdeologıalyq salalar boıynsha birqatar bastama kóterdi. Olardyń basym bóligin Úkimet júzege asyrady. Sondyqtan maqalada mańyzdy jıynnan keıin qolǵa alynǵan jumystarǵa kóz júgirtemiz.

Bastamalardy oryndaý jospary qabyldandy

1 sáýirde Memlekettik keńesshi Erlan Qarın Telegram arnasynda Prezıdenttiń Ulttyq quryltaıdyń IV otyrysynda kóter­gen bastamalaryn oryndaý jospary qabyl­danǵanyn habarlady. 53 tarmaqtan turatyn qujatty Prezıdent Ákimshiligi Úkimetpen birlese daıyndaǵan. Onda kelesi bastamalar qamtylǵan:

• «Qazaqstan balalary» biryńǵaı baǵ­darlamasyn ázirleý;
• İshki saıasat tujyrymdamasyn ázirleý jáne bekitý;
• Nashaqorlyqqa jáne esirtki bıznesine qarsy kúrestiń 2026–2028 jyldarǵa arnal­ǵan jańa keshendi josparyn qabyldaý;
• Ulttyq sıfrlyq arhıv qurý;
• Bıznes ókilderin tarta otyryp, aımaq­tarda teatrlar salý jáne damytý, sondaı-aq ulttyq teatrlarǵa qoldaý kórsetý;
• Shetelde Abaı ınstıtýtyn ashý;
• Halyqaralyq bıologıalyq áralýan­dyqty qorǵaý qoryn qurý;
• «Jaıly mektep» ulttyq jobasyn júze­ge asyrýdy jalǵastyrý, úsh jylda 1300 mektepti jańǵyrtý;

Erekshe qajettiligi bar adamdarǵa ar­nalǵan zamanaýı ońaltý ortalyqtaryn ashý, árbir oblys ortalyǵynda erekshe qajettiligi bar balalardy ońaltý jáne damytý orta­lyqtaryn qurý;

Óńirlerdi damytý tujyrymdamasyna qatysty tyń tásilderdi engizý;

2025-2026 jyldary iri ınfraqury­lymdyq jobalardy júzege asyrý, sonyń ishinde Astanadan Arqalyq, Torǵaı jáne Yrǵyz arqyly Transkaspıı halyqaralyq kólik dálizine týra shyǵatyn avtokólik jolyn salý jáne jańǵyrtý, Arqalyqtaǵy áýejaı­dy qalpyna keltirý jáne jańa aerovokzal keshenin salý;

Aldaǵy tórt jyl ishinde elimizde jyl saıyn 200-ge jýyq ınvestısıalyq jobany iske qosý.

Úkimet jumysty belsendi bastady

Parlament Prezıdent bastamalaryn zańnamalyq turǵydan qoldaý kórsetse, Úki­met atqarýshy organ retinde ony oryndaý­men aınalysady. Biz «14 naýryzdan beri Úkimet ne atqardy?» degen suraqqa jaýap berý úshin onyń resmı aqparattyq resýrsta­ryn sholyp shyqtyq.

Eń aldymen, Premer-mınıstr Oljas Bektenov Prezıdenttiń bılikke kelgenine 6 jyl tolýyna oraı arnaıy maqala jazdy. Maqala 17 naýryzda Premer-mınıstrdiń resmı saıtynda jarıalandy. Onda elimizdiń sońǵy alty jyldaǵy áleýmettik-ekonomıka­lyq jetistikteri atap ótilgen. Sonyń ishinde 2024 jyly JİÓ 288 mlrd, al jan basyna shaqqanda 14 myń AQSH dollary bolǵany aıtylady. Bul shynynda da jetistik.

Árıne, munymen toqtap qalýǵa bolmaı­dy. Sebebi, elimiz «ortasha ósim torynan» shyǵýy tıis. Prezıdent óz Joldaýlarynda, Úkimettiń keńeıtilgen otyrystarynda, Ult­tyq quryltaı jıyndarynda osy baǵytta bastamalar kóterip keledi.

Qysqa ýaqyttyń ishinde Úkimet basshyly­ǵy men músheleri Ulttyq quryltaıdyń sońǵy otyrysyndaǵy bastamalardy júzege asyrý úshin birneshe jıyn ótkizdi. Atap óter bolsaq, Oljas Bektenovtiń basshylyǵymen:

17 naýryzda Úkimet otyrysy ótti. Onda Premer-mınıstrdiń orynbasary Serik Ju­manǵarın, eks-energetıka mınıstri Almasa­dam Satqalıev, Sıfrlyq damý, ınovasıa­lar jáne aeroǵarysh ónerkásibi mınıstri Jaslan Mádıev, Mádenıet jáne aqparat mınıstri Aıda Balaeva, Týrızm jáne sport mınıstri Erbol Myrzabosynov, Ekologıa jáne tabıǵı resýrstar mınıstri Erlan Ny­sanbaev sekildi Úkimet músheleri baıandama jasady. Baıandama jasaǵan mınıstrlerdiń quramynan-aq mańyzdy qorytyndy jasaýǵa bolady. Ulttyq quryltaıdaǵy bastamalar­dy júzege asyrýǵa basty jaýapty Serik Ju­manǵarın ekenin baıqaımyz;

27 naýryzda Premer-mınıstr Pavlo­dar oblysyna jumys saparymen bardy. Onda ónerkásipti damytý boıynsha másele­ler qaraldy. Prezıdent quryltaıda buǵan asa mán bergen;

1 sáýirde ótken Úkimet otyrysynda memlekettik qyzmet kórsetý salasyn damytý men sıfrlandyrý máselesi qaraldy. Jıyn­da Sıfrlyq damý, ınovasıalar jáne aero­ǵarysh ónerkásibi mınıstri Jaslan Mádıev, HQKO jumysy jáne halyqqa qyzmet kórsetý tártibi týraly «Azamattarǵa arnalǵan úki­met» memlekettik korporasıasy» KeAQ bas­qarma tóraǵasy Arman Kenjeǵalıev, «Elektrondy úkimette» áleýmettik mańyzy bar jobalardy iske asyrý barysy týraly BTS Digital bas dırektory Nurtaı Ábilǵa­lıev, bank júıelerinde memlekettik qyzmet kórsetý tártibi týraly – Kaspi.kz basqarma tóraǵasy Mıhaıl Lomtadze men Freedom Holding Corp. bas atqarýshy dırektory Tı­mýr Týrlov baıandama jasady. Prezıdent sıfrlandyrý men JI salasyn damytý máse­lelerin jeke ózi baqylaýda ustaıtynyn málimdegen bolatyn. Sondyqtan sıfrlan­dyrý salasyn talqylaýǵa Úkimet músheleri ǵana emes, jeke sektor ókilderi de qatysqan;

7 sáýirde Oljas Bektenov otandyq aýyl sharýashylyǵy taýaryn óndirýshiler­men kezdesý ótkizgen. Onda agroónerkásip keshenin damytý máseleleri, kóktemgi dala jumystarynyń barysy, sharýalardy qoldaý sharalary, sondaı-aq qosymsha pysyqtaýdy qajet etetin ózara is-qımyl baǵyttary tal­qylanǵan. Memleket basshysy Joldaýla­rynda jáne bıylǵy quryltaı otyrysynda aýyl sharýashylyǵyna mán berdi. 2024 jyly qabyldanǵan ekonomıkany lıberalı­zasıalaý qujatynda da ASHK negizgi ósim draıverleriniń biri retinde kórsetilgen.

Osy jáne ózge de jıyndardy taldaı kele mynadaı qorytyndy jasaýǵa bolady: jalpy bılik sıfrlan­dyrýǵa jáne dıalogqa basymdyq berýde. Dıa­log kóbine salalyq ma­mandarmen jasalýda.