Memleket basshysy Qasym-Jomart Toqaev balalardy zorlyq-zombylyqtan qorǵaý, ózine-ózi qol salýdyń aldyn alý jáne jalpy balalar men áıelder quqyǵyn qorǵaýǵa qatysty qabyldanǵan sharalardy atap ótti, dep habarlaıdy aqshamnews.kz
«Bıyl balalardy zorlyq-zombylyqtan qorǵaý, ózine-ózi qol salýdyń aldyn alý týraly jospardyń merzimi de aıaqtalady. Biz áıelder men balalardyń quqyǵyn qorǵaý úshin naqty sharalar qabyldadyq», – dedi Prezıdent.
Qasym-Jomart Toqaev ótken jyly barlyq aımaqta balalarǵa psıhologıalyq qoldaý kórsetetin ortalyqtar ashylǵanyn jáne turmystyq zorlyq-zombylyqpen kúreske qatysty zańdar qabyldanǵanyn atap ótti. Bul zańdardyń nátıjesinde ahýal birshama jaqsarǵanymen, keıbir shalǵaı aýdandarda turmystyq zorlyq-zombylyqtyń áli de jalǵasyp jatqanyn aıtty. Sondaı-aq, jat dinı aǵymdardyń jeteginde júrgen adamdar jaǵdaıdy odan ári qıyndatatynyn eskertti.
Prezıdent jergilikti bılik ókilderi men qoǵam belsendileriniń turmystyq zorlyq-zombylyqtyń aldyn alý jumystarynan shet qalyp otyrǵanyn, sonymen qatar, bul baǵyttaǵy jumystardyń shashyrańqy bolyp turǵanyn atap ótti.
«Sonyń bárin bir jerge jınaqtaǵan durys dep oılaımyn. Osyǵan oraı, «Qazaqstan balalary» atty birtutas baǵdarlama qabyldaǵan jón», – dep qosty Memleket basshysy.
Sonymen qatar, Memleket basshysy ozyq oıly urpaq ósirý úshin bilim men tárbıeniń qatar júrýi qajettigin atap ótti.
«Ashyǵyn aıtsaq, bala oqytý isinde buǵan deıin bilimge kóbirek nazar aýdaryldy. Al urpaq tárbıesine qatysty júıeli ustanym bolǵan joq. Bul salaǵa tıisti deńgeıde kóńil bólinbeı keldi. «Tárbıesiz berilgen bilim – adamzattyń qas jaýy». Sondyqtan bilimmen qatar tárbıege aıryqsha nazar aýdarý óte mańyzdy», – dep qorytyndylady Qasym-Jomart Toqaev.