Parıj Olımpıadasynyń qola júldegerleri Ǵusman Qyrǵyzbaev pen Le Aleksandra Almatydaǵy ekologıalyq marafon – ploggıngke qatysty.
Sport pen ekologıa – bir-birimen tyǵyz baılanysty. Bul qaǵıdany Olımpıada júldegerleri óz isimen dáleldedi. Parıj Olımpıadasynyń qola júldegeri, dzúdoshy Ǵusman Qyrǵyzbaev “Taza qala” aksıasyna qatysyp, óz mektebiniń mańyn tazalaýǵa atsalysty.
“Uly ister kishkentaı qadamnan bastalady. Búgin biz Almaty qalasynda “Taza qala” aksıasyna qatysyp, óz mektebimizdiń aınalasyn tazaladyq. Bul is ózimizden keıingi urpaqqa úlgi bolsa eken deımin”, – dedi Ǵusman.
Le Aleksandra da qorshaǵan ortany qorǵaýdyń mańyzdylyǵyn atap ótti. Ol bul aksıanyń Almaty qalasynyń turǵyndary úshin erekshe ról atqaratynyn aıtty:
“Almaty – bizdiń ortaq úıimiz. Men bul aksıaǵa qatysyp jatqanyma óte qýanyshtymyn. Osyndaı sharalardy uıymdastyrý óte mańyzdy. Eger árbir turǵyn qala tazalyǵyna úles qossa, ómir súrý áldeqaıda jaıly bolar edi. Sportpen aınalysyp, taza qalada serýendegenge ne jetsin!” – dedi Olımpıada júldegeri.
Ekologıalyq marafon – tek qalany tazartý ǵana emes, sonymen qatar salaýatty ómir saltyn nasıhattaýdyń bir joly. Osyndaı bastamalar arqyly tanymal sportshylar jastarǵa durys úlgi kórsetip, qorshaǵan ortany qorǵaýǵa degen jaýapkershilikti arttyrýǵa yqpal etedi.Bul aksıa – tabıǵatqa degen qamqorlyqtyń, belsendi ómir saltynyń jáne bolashaq urpaqqa qaldyrar taza álemge degen nıettiń kórinisi.