Jýyrda A.N. Syzǵanov atyndaǵy Ulttyq ǵylymı hırýrgıa ortalyǵy elimizdiń medısına tarıhynda tuńǵysh ret bir mezette úsh naýqasqa úsh donordyń búıregin toǵyspaly transplantasıa tásilimen salatyn asa kúrdeli operasıany sátti ótkizdi.
Aqshamnews.kz saıty bul týraly osyǵan deıin habarlaǵan.
Prezıdent belgili hırýrg, profesor Bolatbek Baımahanovtyń jetekshiligimen jasalǵan bul operasıany otandyq medısınanyń zor jetistigi retinde baǵalap, ortalyq ujymyna Alǵys hat joldady.
– Memleket densaýlyq saqtaý salasyn damytýǵa basa mán beredi. Bul rette kóptegen irgeli bastama qolǵa alynyp, aýqymdy jumys atqarylyp jatyr. Sonyń nátıjesinde ulttyq medısına qarqyndy damyp keledi. Sizder jasaǵan biregeı operasıa – sonyń aıqyn dáleli. Qazir elimiz óte kúrdeli transplantasıalyq operasıa jasaıtyn álemdegi alty memlekettiń qataryna kiredi. Bul jetistikke otandyq mamandardyń, sonyń ishinde ózderińizdiń qajyrly eńbekterińiz ben erekshe bilimderińizdiń, sondaı-aq teńdessiz tájirıbelerińizdiń arqasynda jetip otyrmyz. Barshańyzǵa shynaıy rızashylyǵymdy bildiremin. Bolashaqta da ult saýlyǵyn jaqsartý úshin tynymsyz ter tógip, halqymyzǵa qaltqysyz qyzmet ete beresizder dep senemin, – delingen Alǵys hatta.
Eske sala keteıik, sol operasıa kezinde 12 saǵat boıy medısınalyq kórsetilimder boıynsha týystarymen úılespeıtin pasıentterdiń arasynda úsh donorlyq operasıa jáne úsh búırekti transplantattaýdy júrgizildi. Bul el tarıhyndaǵy alǵashqy úshtik operasıa boldy.