Memleket basshysy Qazaqstan Respýblıkasy Prezıdentiniń «Altyn sapa» jáne «Paryz» syılyqtarynyń ıegerlerin saltanatty túrde marapattaý rásiminde beınebaılanys rejıminde sóz sóıledi
Qasym-Jomart Toqaev óz sózinde «Altyn sapa» baıqaýy 15 jyldan beri ótkizilip kele jatqanyn jáne búginge deıin 150-den astam kompanıa Prezıdent syılyǵynyń ıegeri atanǵanyna nazar aýdardy, dep habarlaıdy Almaty-akshamy.kz Akorda.kz-ke silteme jasap
«Bıylǵy saltanatty jıyn Táýelsizdiktiń 30 jyldyq mereıtoıymen tuspa-tus kelip otyr. Munyń zor sımvoldyq máni bar. Egemendik kezeńinde Qazaqstanda bıznestiń damýyna jan-jaqty jaǵdaı jasaldy. Sonyń nátıjesinde jańa zamanǵa saı kásipkerler shoǵyry qalyptasty. Olar ulttyq ekonomıkanyń basty qozǵaýshy kúshine aınalýda», - dedi Memleket basshysy.
Prezıdent otandyq bıznestiń elimizdi ındýstrıalandyrý úderisindegi úlesi týraly aıta kele, sońǵy 10 jylda óńdeý ónerkásibiniń ekonomıkadaǵy úlesi taý-ken salasynyń kórsetkishinen asyp, 13 paıyzǵa jetkenin atap ótti.
«Búkil elimiz boıynsha 1500 jańa óndiris iske qosyldy. Bul maqsatqa 9 trıllıon teńgeden astam ınvestısıa jumsaldy. 220 myńnan astam turaqty jumys orny ashyldy. Byltyr óńdeý ónerkásibiniń eksporty 3 ese ósip, 15,4 mıllıard dollarǵa jetti. Qazaqstanda óńdelgen ónimder búginde 131 memleketke eksporttalady», - dedi Qasym-Jomart Toqaev.
Memleket basshysy otandyq ónerkásipti, medısına ǵylymyn sıfrlandyrý isindegi jetistikterge toqtaldy.
Prezıdent óz Joldaýynda 2025 jylǵa qaraı óńdeý ónerkásibiniń eksportyn 1,5 esege, eńbek ónimdiligin 30 paıyzǵa arttyrý mindetin júktegenin eske saldy. Onyń pikirinshe, bul asa mańyzdy maqsat. Oǵan qol jetkizý úshin barlyq múmkindik bar jáne qajetti jaǵdaılar jasalýda.
Osy rette, Qasym-Jomart Toqaev otandyq óńdeý ónerkásibiniń shıkizatqa qoljetimdiligin qamtamasyz etetin «Ónerkásip saıasaty týraly» zańdy tezirek qabyldaýdyń mańyzdy ekenin atap ótti.
Sonymen qatar Memleket basshysy otandyq bıznestiń kórshi elderdiń naryǵyna shyǵýy úshin zamanaýı ınfraqurylymdy damytý qajettigi jóninde aıtty.
– «Qorǵas» shekara mańy yntymaqtastyǵynyń halyqaralyq ortalyǵy tabysty jumys istep tur. Sonymen qatar taǵy tórt transshekaralyq hab: onyń ekeýin Reseımen shekarada, Ózbekstanmen jáne Qyrǵyzstanmen shekarada bir-birden salý josparlanýda. Bul tranzaksıalyq shyǵyndardy azaıtýǵa, kólik logıstıkasynyń tıimdiligin arttyrýǵa jáne nátıjesinde eksportymyzdy ulǵaıtýǵa múmkindik beredi, - dedi Prezıdent.
Memleket basshysy elimizde óndiriletin taýarlardyń básekege qabilettiligin arttyrýdyń jáne sapany baqylaýdyń zamanaýı júıesin engizýdiń mańyzdylyǵyna nazar aýdardy.
«Kásiporyndardyń bıznes-prosesterine jasalatyn dıagnostıka osy saladaǵy jahandyq úrdisterge saı bolýǵa tıis. Bul jerde, eń aldymen, sıfrlandyrý jáne Indýstrıa 4.0 elementterin paıdalaný týraly sóz bolyp otyr. Osyǵan baılanysty «Altyn sapa» konkýrsynyń talaptaryn Sapany basqarýdyń eýropalyq qorynyń (EFQM) jańa modeline birtindep sáıkestendirý kerek. Biz úzdik halyqaralyq úlgiler men tájirıbelerge saı bolýymyz qajet», - dedi Qasym-Jomart Toqaev.
Sonymen qatar Memleket basshysy ónerkásip salasynda bilikti mamandardyń jetispeıtinine erekshe nazar aýdardy. Bul – ındýstrıalandyrý úderisin tejeıtin faktorlardyń biri.
«2025 jylǵa qaraı 500-ge jýyq ındýstrıalyq jobany iske qosýdy josparlap otyrmyz. Úkimet atalǵan óndiris oryndarynda jumys isteıtin bilikti kadrlardy osy bastan daıyndaýy kerek. Búginde memleket jumys berýshilerge naqty qoldaý kórsetip otyr. Jumys ornynda oqytý, «Urpaqtar kelisimsharty» jáne «Alǵashqy jumys orny» sıaqty jas mamandarǵa qoldaý kórsetý sharalary iske asyrylýda. Memleket tarapynan tıisti sýbsıdıalar qarastyrylǵan. Degenmen, áli de jetkiliksiz. Úkimet «Atameken» ulttyq kásipkerler palatasymen birlese otyryp, jumyspen qamtýdy jáne qyzmetkerlerdiń biliktiligin arttyrýdy yntalandyrýǵa baǵyttalǵan qosymsha sharalardy pysyqtaýy qajet», - dedi Prezıdent.
Qasym-Jomart Toqaev indet kezinde elimizdiń densaýlyq saqtaý júıesine zor qoldaý kórsetken otandyq kásipkerler men Qazaqstandaǵy halyqaralyq kompanıalar áleýmettik jaýapkershilik qaǵıdasyn árdaıym berik ustanatynyn atap ótti.
Budan bólek bıylǵy «Paryz» baıqaýyna qatysýshylardyń áleýmettik jobalarǵa jáne qaıyrymdylyq sharalarǵa 20 mıllıard teńgege jýyq qarjy jumsaǵany atap ótildi. Olar 7 myń jańa jumys ornyn ashqan.
«Elimizdi órkendetýge jáne halyqtyń ál-aýqatyn arttyrýǵa bıznes ókilderi barynsha atsalysýda. Osy oraıda men barsha kásipkerlerge shynaıy rızashylyǵymdy bildiremin. Sondaı-aq osy baıqaýlarǵa qatysqan kásiporyndarǵa arnaıy alǵys aıtamyn. Ásirese, eńbek ujymdaryn bólek atap ótkim keledi. Bul marapattar – kóp jylǵy qajyrly eńbektiń jemisi», - dedi Memleket basshysy.
Prezıdent konkýrs jeńimpazdaryn jarıalap, shyn júrekten quttyqtady. Sondaı-aq búgingi marapat olardyń jumystarynyń odan ári tabysty bolýyna tyń serpin beretinine senim bildirdi.
Bıyl «Altyn sapa» konkýrsynyń «Úzdik ındýstrıalyq joba» nomınasıasyn «YDD Corporation» jaýapkershiligi shekteýli seriktestigi (Qaraǵandy oblysy) ıelendi, «Úzdik ınovasıalyq joba» nomınasıasy boıynsha ««Agrofırma TNK» (Aqmola oblysy) jaýapkershiligi shekteýli seriktestigi úzdik atandy. «PO Global-Spesodejda» jaýapkershiligi shekteýli seriktestigi (Aqtóbe oblysy) men «Karachaganak Petroleum Operating B.V.» jaýapkershiligi shekteýli seriktestiginiń qazaqstandyq fılıaly (Batys Qazaqstan oblysy) «Paryz» konkýrsynyń bas júldesin ıelendi. Jeńimpazdarǵa júldelerdi Premer-Mınıstr Asqar Mamın tabystady.