Memleket basshysy Qasym-Jomart Toqaev Ult ustazyna arnalǵan eskertkishti ashty.
Prezıdent Almaty qalasynda Ahmet Baıtursynulyna arnalǵan eskertkishtiń ashylý saltanatyna qatysty, dep habarlaıdy Almaty-akshamy.kz Aqordaǵa silteme jasap.
Memleket basshysy Almaty qalasyna jumys sapary barysynda aǵartýshy, ult ustazy Ahmet Baıtursynulynyń mýzeı-úıine bardy.
Prezıdent aldymen mýzeıdiń «Ulttyq rýhtyń uly tini», «Qazaq sanasynyń shamshyraǵy» jáne «A.Baıtursynulynyń jumys kabıneti» zaldaryndaǵy jádigerlermen tanysty. Munda uly tulǵanyń ómiri men shyǵarmashylyǵy týraly 500-ge jýyq eksponat jınaqtalǵan.
Ahmet Baıtursynuly bul úıde qyzy Sholpannyń otbasymen birge 1934-1937 jyldary turǵan. Mýzeı-úıi 1998 jyly Alash qaıratkeriniń 125 jyldyq mereıtoıynda saltanatty túrde ashyldy.
Sodan keıin Qasym-Jomart Toqaev Ahmet Baıtursynulyna arnalǵan eskertkishti ashty. İs-sharaǵa aqynnyń týystary men zıaly qaýym ókilderi qatysty. Memleket basshysy eskertkishtiń ashylý rásimine jınalǵandar aldynda sóz sóılep, tulǵanyń ult tarıhyndaǵy róli joǵary ekenin aıtty.
«Jurtyna paıdasy tıetin jumystyń bárine Ahań úles qosqan. Tipti, birqatar salany ózi bastap bergen. Ol qazaqtyń tól álipbıin jasady, alǵashqy álippemizdi qurastyrdy. Sondaı-aq oqýlyq jazyp, til biliminiń negizin qalady. «Qazaq» gazetin shyǵaryp, baspasózdiń damýyna jol ashty. Arada qansha jyl ótse de, onyń rýhanı murasy jurtynyń ıgiligine jarap keledi. Sol sebepti jurtymyz ony «Ult ustazy» dep ardaqtaıdy. Ahmet Baıtursynuly – aǵartýshy-ǵalym retinde búkil órkenıetti álemge tanymal. Ol halqymyzdyń taǵdyry synǵa túsken kúrdeli kezeńde erekshe ultjandylyq tanytty. Elimiz bútin, jerimiz tutas bolýy úshin ólsheýsiz eńbek sińirdi. Qazaqqa qyzmet etý jolynda bar kúsh-jigerin jumsady. Ult kóshbasshysynyń ómir jolyn eldi súıýdiń jarqyn úlgisi deýge bolady. Onyń ǵıbratty ǵumyry – óskeleń urpaq úshin árdaıym ónege», – dedi Memleket basshysy.
Prezıdent Alash arysynyń týǵan jeri Torǵaı óńirinde dúbirli toı ótkenin, IýNESKO, TÚRKSOI uıymdary aıasynda alqaly jıyndar uıymdastyrylǵanyn atap ótti. Ahmet Baıtursynulynyń 12 tomdyq shyǵarmalar jınaǵy basyp shyǵarylyp, tańdamaly eńbekteri 4 tilde jaryq kórdi.
«Qostanaı qalasyndaǵy áýejaıǵa Ahmet Baıtursynulynyń esimi berildi. Torǵaıda Mirjaqyp Dýlatuly ekeýine eskertkish ornatylyp, qos alyptyń ádebı mýzeıi tolyq jańǵyrtyldy. Byltyr osy Almatydaǵy murajaıy memleket menshigine qaıtaryp alynǵanyn bilesizder. Endi, mine, qala tórinde sáýletti eskertkishi boı kóterdi. Osynyń bári – halqymyzdyń ult ustazyna degen erekshe qurmetiniń belgisi. Kezinde Muhtar Áýezov «Ahańnyń qazaq balasyna istegen eńbegin, óner, bilim, saıasat jolyndaǵy qajymaǵan qaıratyn biz umytsaq ta, tarıh umytpaıdy» degen bolatyn. Ahmet Baıtursynulynyń urpaqqa amanat etken mol murasy – qazaqtyń baǵa jetpes asyl qazynasy. Búginde Ahmettaný ǵylymyna bet buryp, ǵalymnyń shyǵarmashylyǵyn zerttep júrgen jastardyń qatary kóbeıip keledi. Bul – uly tulǵanyń ulaǵatty joly eshqashan úzilmeıdi degen sóz», – dedi Qasym-Jomart Toqaev.
Memleket basshysy saltanatty rásimnen keıin aqynnyń urpaqtarymen, zıaly qaýym ókilderimen, sondaı-aq eskertkish avtorlary Aıdos Búrkitbaevpen jáne Tımýr Ermuhametovpen áńgimelesip, sýretke tústi.
Eskertkishtiń avtorlary – músinshiler Aıdos Búrkitbaev pen Tımýr Ermuhametov.
Músin kompozısıasy qoladan, tuǵyry tutas kúrt granıtinen jasalǵan eskertkishtiń bıiktigi – 5 metr.