Radıo tolqynynda tyńdarman Dımashtyń ǵana emes, basqa da qazaq ónerpazdarynyń ánderin tyńdaı alady.
Sonymen qatar efırde elimizdiń ádet-ǵurpy, salt-dástúri, mádenıeti týraly da aıtylady, dep habarlaıdy Almaty-akshamy.kz.
24.kz aqparatyna sáıkes, «Dımash» radıostansıasyn qurý ıdeıasy Polshadaǵy Dımash Qudaıbergenniń fan-klýbyna tıesili. Bastapqyda ánshiniń polák jankúıerleri BAQ salasynda tájirıbesi bolmaǵanyn jáne olar júre úırengenin aıtty. Biraq qazir stansıa aptasyna jeti kún, táýligine 24 saǵat búkil álemge habar taratady eken.
«Men Dımashtyń shyǵarmashylyǵymen Singer shoýynyń arqasynda tanystym. SOS áni - keremet dúnıe! Birden qyzyǵýshylyq tanytyp, «Kelesi konsert qaı jerde bolsa da, mindetti túrde Dımashty tikeleı efırde tyńdaýym kerek», dep sheshim qabyldadym. Bir aıdan keıin ol Londonda óner kórsetti. Men bardym. Keıinnen radıostansıa qurý ıdeıasy keldi. Bizdiń demeýshimiz joq, fan-klýbymyz kómektesedi. Redaktorlar, júrgizýshiler, men - bárimiz tegin jumys isteımiz», - dedi «Dımash» radıosynyń negizin qalaýshy Zbıgnev Kýjınskıı.
Sondaı-aq radıostansıa tolqynynda Qazaqstannyń barlyq aıtýly oqıǵalary men merekeleri toılanady. Al tamyz aıynda Abaıǵa arnalǵan taqyryptyq habarlar bolady. Dımashtyń ánderin, jalpy qazaq halqynyń mádenıetin túsiný úshin radıodan qazaqsha sabaqtar da ashylǵan.