Qazaqstanda ınternet pen áleýmettik jeliler arqyly jasalatyn alaıaqtyq faktileri jıilep ketken.
Almaty polısıasy smartfonǵa «AnyDesk» baǵdarlamasyn júktemeýge shaqyrdy, – dep habarlaıdy Almaty-akshamy.kz Polisia.kz saıtyna silteme jasap.
Sońǵy kezderi Almaty qalasynyń aýmaǵynda jáne jalpy Qazaqstan Respýblıkasynda ınternet pen áleýmettik jeliler arqyly jasalatyn alaıaqtyq faktileri jıilep ketken. Sonymen qatar, qaskóıler ártúrli qylmystyq tizbekter boıynsha áreket etedi, ádette, áleýmettik jelilerdi, WhatsApp, Telegram messendjerlerin jáne turaqty telefon baılanystaryn paıdalanady.
«Tájirıbe kórsetkendeı, kez kelgen adam alaıaqtardyń qurbany bolýy múmkin. Degenmen, egde jastaǵy adamdar shyǵynǵa kóbirek ushyraıdy. Aıta ketý kerek, mundaı qylmystardy tergegen kezde tergeý organdary Qazaqstan Respýblıkasynan tysqary jerlerge aqsha aýdarý sıaqty máselelerge tap bolady, qaskóıler bir rettik uıaly telefondar men abonenttik nómirlerdi paıdalanady, al mundaı qylmystardy ashý orasan zor kúsh salýdy talap etedi», – dedi Almaly aýdandyq Polısıa basqarmasynyń bastyǵy Esen Ysqaqov.
Tájirıbede jıi kezdesetin bir mysal. Qaskóı(ler) ózin banktiń qaýipsizdik qyzmetkeri retinde jalǵan atpen áleýetti jábirlenýshiniń uıaly telefonyna qońyraý shalyp, sol arqyly senimge kirýge tyrysady. Ádette, sóıleý máneri óte sypaıy bolady. Sodan keıin alaıaq jańa ǵana belgisiz bireýler tólem kartasyn ruqsatsyz buzyp, odan aqshany sheship almaq bolǵanyn nemese kúdikti árekettiń anyqtalyp, bireýdiń nesıe almaq bolyp jatqanyn habarlaıdy. Sosyn qaskóı nusqaýlardy oryndaýdy jáne SMS-kodtaryn habarlaýdy talap etedi. Kórsetilgen SMS sandar túrindegi kodtar arqyly qaskóıler jábirlenýshiniń kartasynan basqa kartalarǵa aqsha aýdarady. Tájirıbe kórsetkendeı, aqsha kóbinese Reseı Federasıasyna nemese kórshi elderge aýdarylady.