Almatyda qala Máslıhatynyń deputattary men Qoǵamdyq keńes músheleríníń bírlesken keńeıtílgen otyrysy óttí.
Jıyn barysynda Almatynyń 2040 jylǵa deıíngí Bas josparyna engízíletín túzetuler máselesí qaraldy, - dep habarlaıdy Aqshamnews.kz.
Otyrysqa qatysushylarǵa Bas jospardy túzetu jobasy boıynsha tolyqqandy tanystyrylym ūsynylyp, barlyq baǵyt boıynsha jan-jaqty árí naqty aqparat beríldí.
Almaty ákímíníń orynbasary Beıbít Shahanov būl kezdesu qūjattyń negízgí erejelerín aldyn ala talqylauǵa, eskertuler men ūsynystardy eskeruge baǵyttalǵanyn atap óttí. Onyń aıtuynsha, būl ūsynystar jobany keń kólemde qoǵamdyq talqylauǵa shyǵaruda mańyzdy ról atqarady.
«Jobanyń qoǵamdyq talqylauy bıyl 24–26 jeltoqsan aralyǵynda ótedí. Bízdíń ortaq míndetímíz — qala damuynyń múddesí men strategıyalyq baǵyttaryn aıqyn kórsetetín, jan-jaqty árí sapaly pysyqtalǵan qūjatty ūsynu. Aldymyzda ūsynylǵan jobany talqylaudyń barynsha ashyq, ınklyuzıvtí jáne kásíbı úderísín qamtamasyz etu míndetí tūr», — dedí Beıbít Shahanov.
Óz kezegínde qalalyq Máslıhattyń qūrylys, sáulet, qala qūrylysy, jer qatynastary jáne qoǵamdyq keńístíkterdí damytu jóníndegí komıssıyasynyń tóraǵasy Dáuren Maralov Bas jospardy túzetu qala damuynyń joǵary qarqyny jaǵdaıynda teńgerímdí damudy qamtamasyz etu, sondaı-aq Memleket basshysynyń tau bókterínde qūrylys saluǵa tyıym salu jóníndegí tapsyrmasyn eskeru úshín qajet ekenín aıtty.
«Halyq sanynyń ósuí áleumettík ınfraqūrylymdy edáuír kúsheıtudí talap etedí. 2030 jylǵa deıín 107,5 myń oqushy orny, 101,5 myń balabaqsha orny, 1,2 mln sharshy metr medıtsınalyq nysandar, sondaı-aq mádenıet, sauda jáne órt qauípsízdígí obektíleríníń damyǵan jelísín salu qajet. Polıortalyqtardy damytu erekshe mańyzǵa ıe. Būl mayatnıktík kóshí-qondy azaıtyp, ekonomıkalyq belsendílíktí qaıta bóluge múmkíndík beredí. Qazírgí tańda kún saıyn ortalyqqa shamamen 600 myń sapar jasalady. Polıortalyqtardy qalyptastyru kólík júıesíne túsetín júktemení azaıtyp, ómír sapasyn arttyruǵa jol ashady. Osy tūrǵyda Bas jospardy túzetu — formaldylyq emes, qala úshín asa qajettí qadam. Būl jūmysty qoldaımyn jáne ony qalanyń bolashaǵy úshín strategıyalyq mańyzy bar dep esepteımín», — dedí Dáuren Maralov.
Qalalyq Qoǵamdyq keńestíń tóraǵasy Mahambet Hasenov te óz sózínde Bas jospardy túzetu jobasyn qoldaıtynyn aıtty. Onyń aıtuynsha, qūjat megapolıstíń negízgí ekologıyalyq míndetteríne tolyq jauap beredí.
«Túzetu jasyl aımaqtardyń aumaǵyn úsh eseden asa ūlǵaıtyp, 3 800 gektarǵa deıín jetkízudí kózdeıdí. Būl jańa orman men sayabaqtar saludy, ózen ańǵarlaryn qorǵaudy jáne qalanyń bírtūtas ekologıyalyq qūrylymyn qalyptastyrudy qamtıdy. Sonymen qatar qūrylys tyǵyzdyǵyn tómendetuge erekshe kóńíl bólíngen: būrynǵy gektaryna 330 adam normatıvíníń ornyna shamamen 260 adam deńgeıí qarastyrylyp otyr. Būl ınfraqūrylymnyń shamadan tys júkteluíníń aldyn alyp, kólíkke túsetín qysymdy azaıtyp, shaǵynklımatty jaqsartuǵa múmkíndík beredí. Atalǵan jaıttardyń barlyǵy jobanyń uaqytyly, negízdí árí almatylyqtardyń ómír sapasyn arttyruǵa baǵyttalǵanyn kórsetedí», — dedí ol.
Otyrys qorytyndysy boıynsha Máslıhat deputattary men Qoǵamdyq keńes múshelerí Bas jospardy túzetu jobasyn qoldady. Qoǵam ókílderí ūsynǵan barlyq eskertu men ūsynys júıeleníp, qūjatty odan árí pysyqtau barysynda eskeríletín bolady.