Almatyda polısıa, BAQ jáne qoǵam arasyndaǵy yntymaqtastyqtyń jańa tásilderi talqylandy
İİM Almaty akademıasynda buqaralyq aqparat quraldary, blog-qaýymdastyqtar, qoǵamdyq uıymdar men qazaqstandyq polısıanyń ımıjin jaqsartý baǵytynda jumys isteıtin laýazymdy tulǵalar qatysqan konferensıa ótti. Sharaǵa telearnalardyń, baspa jáne ınternet-basylymdardyń jýrnalıseri, Qazaqstan halqy Assambleıasynyń ókilderi, sondaı-aq İİM basshylyǵy men óńirlik polısıa departamentteriniń orynbasarlary onlaın rejımde qatysty.
Konferensıa barysynda úsh ınstıtýt arasyndaǵy baılanysty jetildirýmen ǵana shektelmeı, problemalyq máseleler men olardy sheshý joldaryna nazar aýdaryldy. Qyzý talqylaýda qatysýshylar zamanaýı úrdisterdi eskere otyryp, ózara is-qımyldy kúsheıtýge, jańa baılanys arnalaryn engizýge jáne azamattar úshin keri baılanys ornatý múmkindikterin keńeıtýge basa nazar aýdarý qajet degen ortaq pikirge keldi.
«Biz búgin polısıa men qoǵamnyń ózara áreketin jaqsartý úshin barlyq múmkindikti paıdalanýymyz kerek. Basty mindetimiz – azamattardyń ózderin qaýipsiz sezinýi úshin senimdi nyǵaıtý jáne tıimdi komýnıkasıalyq mehanızmder qurý», – dedi Qazaqstan Respýblıkasy İİM Almaty akademıasynyń bastyǵy mindetin ýaqytsha atqarýshy Janat Dılbarhanova.
Konferensıa qorytyndysy boıynsha qatysýshylar turaqty birlesken is-sharalar ótkizý, polısıa qyzmetkerlerine arnalǵan trenıńter uıymdastyrý, sondaı-aq quqyq qorǵaý organdarynyń medıa jáne qoǵammen jumysyn jetildirýge baǵyttalǵan komýnıkasıalyq strategıalar men ádistemelik usynymdar ázirleý týraly usynystar jasady.