Qaraǵandyda elimizdiń barlyq óńirinen kelgen batyr polıseıler marapattaldy.
Qaraǵandyǵa túrli jaǵdaıda azamattardy qutqaryp qalǵan antyna adal polısıa qyzmetkerleri men Ulttyq ulan ókilderi jınaldy.
İshki ister mınıstrliginiń bastamasymen elimizdiń ár óńirinde “Qazirgi zaman qaharmandary” respýblıkalyq aksıasy ótedi, dep habarlaıdy aqshamnews.kz sala mınıstrligine silteme jasap.
Onyń maqsaty – el úshin týǵan erlerdiń naǵyz patrıotızmin úlgi etý. Aksıa “Halyq qaharmany” Ǵazız Baıtasovtyń erligine arnalady. Polısıa qyzmetkeri lańkesti ustaý kezinde qaza tapqan.
Aksıaǵa qatysýshylar qaıtys bolǵan polısıa qyzmetkerlerine arnalǵan memorıalǵa gúl shoqtaryn qoıdy. B.Beısenova atyndaǵy QR İİM akademıasynda ótken dóńgelek ústelge qatysty.
Qazirgi zaman qaharmandary – batyldyq sabaǵynda oqýshylarmen kezdesti. Elimizde óskeleń urpaqty tárbıeleý úshin júzden astam “Jas saqshy” kadet synyby jumys isteıdi. Atalǵan kadet synyptaryna qaza bolǵan qyzmetkerlerdiń esimi berilgen. Aksıa Kenshiler mádenıet saraıynda ótken saltanatty is-sharamen aıaqtaldy. Onda eńbegi elengen tártip saqshysyna marapattar tabystaldy.
– Búgin biz batyldyq, ar-namys jáne adaldyqtarymen memlekettiń kúshi men ádildigine degen senimdi nyǵaıtatyn azamattarǵa qurmet kórsetý úshin osynda jınaldyq. Sizder batyrsyzdar, naǵyz qorǵaýshysyzdar. Kóshelerdegi qaýipsizdigi men turǵyndardyń tynyshtyǵyn sizder ornatyp júrsizder. Sizder qazirgi zamanǵy polısıanyń qandaı bolýy tıis ekendiginiń jarqyn úlgisisizder, – dedi Qaraǵandy oblysynyń ákimi Ermaǵanbet Bólekpaev.
– Aksıanyń dittegen maqsaty – polıseılerdiń batyrlyǵyn eske alyp qana qoımaı, qoǵamǵa qyzmet etýdiń shynaıy qundylyqtaryn nasıhattaý. Kún saıyn 10 myńnan astam polısıa qyzmetkeri qoǵam qaýipsizdigi úshin sapqa turady. Olar qyzmet babynda halyqtyń qaýipsizdigi jolynda óz ómirlerin qaýip qaterge tigip qana qoımaı, keı kezderi jandaryn berýge de daıyn ekenin atap ótken jón, – dedi QR İİM aqparattyq saıasat departamentiniń bastyǵy Shyńǵys Alekeshev.
Sahnaǵa 15 polısıa qyzmetkeri men Ulttyq ulan ókilderi shyqty. Olar erlik kórsetkeni úshin memlekettik jáne vedimistik nagradalarmen marapattalǵan. Denıs Shemet óz ómirine qaýip tóndire otyryp, jattyǵý kezinde merzimdi qyzmettegi sarbazdy granata jarylysynan aman alyp qalǵan. Qazaqstan Respýblıkasy Prezıdentiniń Jarlyǵymen ol “Aıbyn” ordenimen marapattaldy.
Patrúldik polısıa ınspektory Búrkit Alshynbaev óz ómirin qaterge tigip, avtobýs pen balalardy tasymaldaıtyn júk kóliginiń soqtyǵysýynyń aldyn aldy. Ýchaskelik ınspektor Damır Qorǵanbaev órtten adamdardy qutqaryp qalǵan. Kezdesýge sondaı-aq sýǵa batyp bara jatqan balalarǵa kómek kórsetý úshin sýǵa túsip, qutqarýǵa talpynǵan azamattar da qatysty.
Saltanatty jıynda qyzmet babynda qaza tapqan polısıa qyzmetkerleriniń týystary da boldy. Halyq qaharmany Ǵazız Baıtasovtyń kishi uly Ádiljan Baıtasov ta boldy. Olarǵa da estelik syılyqtar tabys etildi. Táýelsizdik jyldarynda elimizde qyzmettik boryshyn óteý kezinde 819 tártip saqshysy qaza tapty.
Kesh merekelik konsertpen aıaqtaldy.