Esirtki ósetin jerlerdi anyqtaý úshin «Qazaqstan Ǵarysh sapary» AQ ǵaryshtyq spýtnıkteri arqyly jer beti qashyqtyqtan tekserilgen.
Nátıjesinde yqtımal esirtki plantasıalarynyń 60 geografıalyq koordınaty polısıaǵa berilgen. Qazir olarǵa qatysty tergeý amaldary júrgizilip jatyr, dep habarlaıdy Almaty-akshamy.kz QazAqparatqa silteme jasap.
«Qarasora» respýblıkalyq jedel-profılaktıkalyq is-sharasy barysynda zańsyz aınalymnan 32 tonna esirtki tárkilendi.
«Jyl saıyn maýsym-qazan aılary aralyǵynda jabaıy qarasoranyń ósip-jetilýi kezeńinde İshki ister mınıstrligi «Qarasora» respýblıkalyq jedel-profılaktıkalyq is-sharasyn ótkizedi. 1 maýsymnan beri atalǵan shara barysynda 820 esirtki qylmysy anyqtaldy. 6 uıymdasqan qylmystyq toptyń áreketi toqtatylyp, olardyń jetekshileri men 54 qatysýshysy qylmystyq jaýapkershilikke tartyldy», - dedi İshki ister mınıstrliginiń ókili Shuǵyla Turlybek baspasóz máslıhatynda.
İİM málimetinshe, zańsyz aınalymnan 32 tonna esirtki tárkilendi. Onyń ishinde 5,3 tonnaǵa jýyq marıhýana, 476 kelige jýyq gashısh, 241 keliden astam «sıntetıka» jáne 62 keliden astam geroın.
«Qyzylorda, Túrkistan jáne Ulytaý oblystarynda qarasora ósirilgen 65 plantasıa anyqtaldy. Olardyń jalpy aýmaǵy 10 gektardan asty. Bul rette salmaǵy 20 tonnadan asatyn 70 myńnan astam qarasora butalary tárkilenip, joıyldy. Mundaı esirtki ósimdikterin anyqtaý úshin polıseıler Ulttyq ulannyń tikushaqtaryn paıdalanyp, «Búrkit» arnaıy jasaǵynyń qyzmetkerlerin jumyldyrdy. Qyzylorda, Aqtóbe, Túrkistan jáne Ulytaý oblystarynyń aýmaǵynda 150 myń sharshy shaqyrymnan astam jer tekserildi. Jalpy 70 ret áýeden barlaý júrgizildi», - deıdi ol.