«Sálemdemeler sýpermarketi», gıbrıdti elektrondyq poshta, nesıe berý. Almaty poshtasynda 30 jylda ne ózgerdi?
Jyl saıyn 9 qazanda búkil álemde poshta qyzmetkerleriniń merekesi atap ótiledi. Almaty poshta úıine 54 bólimshe kiredi, onda júzdegen qyzmetkerler eńbek etedi. Poshtashylar jyl saıyn mıllıondaǵan hattardy qabyldap, jiberedi jáne myńdaǵan sálemdemelerdi óńdeıdi. Almaty poshtasynyń dırektory Altyn Sadyqova ÓKQ brıfıńinde osy saladaǵy mamandardyń taǵy qandaı ister atqaratynyn aıtty, dep habarlaıdy almaty-akshamy.kz
Jýrnalıserdiń suraqtaryna jaýap bere otyryp, spıker olardyń kompanıasy barlyq qalalar men eldi mekenderdi qosa alǵanda, Qazaqstan Respýblıkasynyń búkil aýmaǵy boıynsha poshtalyq jáne qarjylyq qyzmetterdiń tolyq spektrin usynatyn eń qarqyndy damyp kele jatqan kompanıalardyń biri ekenin atap ótti. Elektrondyq saýdanyń damýymen sálemdeme jóneltilimderiniń aıtarlyqtaı ósýi baıqalady.
Mysaly, «Qazposhta» jyl saıyn klıent úshin qolaıly jaǵdaı jasaýǵa baǵyttalǵan jańa jobalardy iske asyrady.
«2015 jyldan bastap «Sálemdemeler sýpermarketi» jańa qyzmeti engizildi. Bul ózine-ózi qyzmet kórsetý rejıminde poshta jóneltilimderin berý bólimshesi. Ózine-ózi qyzmet kórsetý prınsıpi kezekterdi alyp tastaýǵa jáne sálemdemeni alý ýaqytyn qysqartýǵa múmkindik berdi. Qazirgi ýaqytta klıentter poshta jóneltilimderi týraly habarlamany kútpeýine bolady. Eger klıenttiń telefon nómiri derekter bazasynda tirkelgen bolsa, uıaly telefonǵa sms – habarlama keledi», - dep túsindirdi Altyn Sadyqova.
Sonymen qatar, sol 2015 jyly «Pochtamattar» engizildi. Bul ınternet-dúkender men katalogtarda tapsyrys berilgen taýarlardy berýge arnalǵan avtomattandyrylǵan termınaldar, olar kem degende 8 saǵattyq jumys rejımimen balama jetkizý qyzmeti retinde jasalǵan.
«Sondaı-aq korporatıvtik ınternet portaly bar «post.kz», bul qyzmetterdiń gıpermarketi. Portalda onlaın rejıminde poshta jáne qarjy qyzmetterin paıdalanýshylar úshin onyń yńǵaılylyǵyn arttyrý boıynsha jumystar únemi júrgizilýde. Bul júıe bank kartalaryn baılanystyra otyryp, jeke tulǵalar úshin ınternet-bankıngti júzege asyrýǵa múmkindik beredi. Sondaı - aq bólimshelerde tólemderdi qabyldaý boıynsha termınaldar ornatylǵan», - dep tolyqtyrdy dırektor.
Spıkerdiń aıtýynsha, sońǵy birneshe jyldaǵy úrdis dástúrli poshta kóleminiń jyl saıynǵy tómendeýin kórsetedi. Osylaısha, gıbrıdti elektrondyq poshta (GEP) paıda boldy - bul paıdalanýshylarǵa elektrondyq túrde jekelegen kezeńderde jiberilgen habarlamalarmen nemese qujattarmen almasýǵa múmkindik beretin qyzmet. Osy tendensıalarǵa jaýap retinde gıbrıdti jóneltý qyzmetteri bastapqy kezeńde jóneltimdi elektrondyq poshta (habarlama) nysanynda aqparattyq júıelerdi, ınternet-resýrstardy jáne basqa da elektrondyq tasymaldaǵyshtardy paıdalaný arqyly jiberý arqyly usynylady, bul poshta bólimsheleriniń jumys rejımine qaramastan, paıdalanýshylarǵa keńseden shyqpaı-aq, bólimshelerge barmaı-aq hattardy onlaın jiberýdi júzege asyrýǵa múmkindik beredi.
Jalpy alǵanda, «Qazposhta» 150-den astam elden jóneltilimderdi qabyldaıdy jáne hattar, sálemdemeler alady, bul – úlken artyqshylyq.
Almaty poshtasy jumys istegen jyldary dástúrli emes qyzmetter engizildi. «Qazposhta» kórsetetin qarjylyq qyzmetter spektrine zańdy jáne jeke tulǵalarǵa esep aıyrysý-kassalyq qyzmet kórsetý, óz emısıasynyń tólem kartochkalaryna qyzmet kórsetý jáne jalaqy jobalary, aqsha aýdarymdary, valúta aıyrbastaý, halyqtan tólemderdi qabyldaý kiredi. Sondaı - aq, nesıe berý, áýe jáne temirjol bıletterin satý boıynsha agenttik qyzmetter kórsetiledi.