Almatyda qala ákimi Darhan Satybaldynyń tóraǵalyǵymen megapolıstiń Bas josparyn túzetý jáne aýqymdy qurylys bastamalaryn júzege asyrý máselelerine arnalǵan jıyn ótti, dep habarlaıdy Aqshamnews.kz tilshisi.
Basqosýda polıortalyqtardyń damýyna erekshe mán berildi. Atap aıtqanda, «Batys qaqpa» men «Shyǵys qaqpa» josparlary qala órkendeýiniń jańa tiregine aınalmaq. Bul jobalar jańa turǵyn úıler men iskerlik ortalyqtardy qalyptastyryp, ortalyqqa túsetin salmaqty azaıtady. Sonymen qatar, zamanaýı qoǵamdyq keńistikter, jumys oryndary men áleýmettik ınfraqurylym paıda bolady.
Darhan Satybaldy qurylys sapasyn qatań baqylaý qajettigin basa aıtty.
"Almatynyń Bas josparyn túzetý máselesi qazir kún tártibinde tur. Bul óz kezeginde egjeı-tegjeıli josparlardy qaıta qaraýdy jáne olardy qurylys barysynda buljytpaı saqtaýdy talap etedi. Qala turǵyndarynyń turmysyn nasharlatatyn shamadan tys tyǵyz qurylystan saq bolǵan jón. Árbir joba salalyq basqarmalardyń súzgisinen ótip, muqıat tekserilýge tıis. Belgili bir eskertýler anyqtalsa, olar nysan paıdalanýǵa berilmeı turyp tez arada túzetilýi qajet", – dedi qala ákimi.
Sondaı-aq, ákim jasyl aımaqtardy qorǵaý men mektepterdiń, áleýmettik nysandardyń jaıaý qashyqtyqta ornalasýy asa mańyzdy ekenin atap ótti. Onyń aıtýynsha, basty nazarda qala men turǵyndardyń múddesi turýy kerek, al jeke qurylys kompanıalarynyń paıdasy ekinshi orynda bolýy qajet.
Jańartylǵan Bas jospardyń mańyzdy bóligi – Memleket basshysynyń Almatyǵa sońǵy jumys sapary barysynda bergen tapsyrmasyna sáıkes, taýly aýmaqqa qurylysqa moratorıı jarıalanýy.
Jańa Bas jospar men polıortalyqtardyń josparlaryn júzege asyrý Almatyǵa zamanaýı kelbet syılap, jańa aýdandar, bıznes ortalyqtar men jaıly qoǵamdyq keńistik qurýǵa jol ashady. Bul rette, tarıhı ortalyq saqtalyp, qurylys, áleýmettik nysandar men jasyl aımaqtar arasynda úılesimdi tepe-teńdik ornaıdy. Sonymen birge jańartylǵan jospar qalaǵa sáýlettik tutastyq berip, týrısik tartymdylyǵyn arttyrady.