Bloger Erbolat Janabilovtiń jary Elmıra Tólegenovaǵa qatysty ákimshilik isti qylmystyq iske qaıta saralaý usynyldy, dep habarlaıdy Aqshamnews.kz.
Bul týraly usynysty Sport mınıstrligine qarasty qumar oıyndar men lotereıany retteý komıtetiniń ókili Abdál Baltategi sot otyrysynda bildirdi. Onyń aıtýynsha, is qaralý barysynda ákimshilik óndiris aıasynda jaýap berý múmkin emes birqatar suraqtar týyndaǵan.
"Mysaly, "Zhana Business" JSHS kýrstarynyń naqty qundylyǵy qandaı? Bul kýrstardyń qandaı da bir qaýymdastyǵy bar ma? Naqty baǵasy qansha? Jeńimpazdy anyqtaý nege tikeleı efırde lototron arqyly emes, avtomattandyrylǵan baǵdarlama arqyly júrgizilgen? Baǵdarlamada qandaı algorıtm qoldanylǵan? Osy suraqtardyń barlyǵy Tólegenovanyń áreketterinde alaıaqtyq nemese zańsyz kásipkerlik sıaqty qylmystyq quram belgileri bar ekenin kórsetedi", - dedi Baltategi.
Ol sottan Tólegenovaǵa qatysty ÁQBtK-niń 445-1-baby boıynsha qozǵalǵan ákimshilik isti toqtatyp, materıaldardy sotqa deıingi tergeý organdaryna joldaýdy surady. Buǵan deıin Baltategi Tólegenovanyń kýrstardy satý úshin uıymdastyrylǵan utys oıyndaryn tek "lotereıany jasyrý amaly" dep ataǵan bolatyn.
Al Elmıra Tólegenova taǵylǵan aıyppen kelispeıtinin aıtyp, utys oıyndary men "Baqyt barabany" onyń jeke paraqshalarynda emes, ózi quryltaıshy bolǵan "Zhana Business" JSHS saıty arqyly ótkizilgenin túsindirdi. Onyń qorǵaýshysy Oleg Chernov isti toqtatyp, komıtettiń hattamasyn dálel retinde jaramsyz dep tanýdy surady.
Sot otyrysyna tóraǵalyq etken sýdıa Aqerke Bekturǵanova keńesý bólmesine ketip, sheshimin búgin 15 qyrkúıekte saǵat 16:00-de jarıalaıtynyn habarlady.