Elimizdegi polıgrafıa salasy qoǵamdy aqparattyq qamtamasyz etýde, baspa ónimderin shyǵarýda
jáne medıaındýstrıany damytýda mańyzdy ról atqaryp keledi.
Sońǵy jyldary tehnologıalardyń damýy men salanyń sıfrlandyrylýyna baılanysty polıgrafıa salasyndaǵy mamandyqtar joǵary biliktilikti jáne zamanaýı standarttarǵa beıimdelýdi talap etip otyr.
Qazaqstandaǵy polıgrafıa salasyn damytý úshin bilikti jumysshy kadrlardy daıarlaıtyn «Prıntmedıa tehnologıalar koleji» 2024 jylǵa deıin «Almaty polıgrafıa koleji» degen ataýmen belgili bolǵan edi.
Sonaý 1977 jyly №28 tehnıkalyq ýchılıshe degen ataýmen qurylǵan mekeme elimizdegi osy salaǵa mamandanǵan jalǵyz oqý orny bolyp tabylady. Kolejdi bitirgen túlekter baspa mashınalaryn basqara alady. Sonymen qatar, baspa sapasyna jaýap berip, baspa ónimderiniń (kitaptar, jýrnaldar, jarnamalyq materıaldar) kórkemdik dızaınyn ázirleıdi. Tehnologıalyq prosesterdi baqylaıdy, baspaǵa qajetti materıaldar men ádisterdi tańdaıdy, maketter men faıldardy baspaǵa daıyndaıdy, tústerdi túzetý men bastapqy materıaldardyń sapasyn tekseredi. Sondaı-aq, olar daıyn baspa ónimderin jınaqtaý jáne bezendirý jumystarymen de aınalysady.
Kolej jumysshy mamandyqtaryn daıarlaý barysynda teorıalyq bilimdi seriktes kásiporyndardaǵy praktıkalyq daǵdylarmen ushtastyrady. Bul mamandardy joǵary sapada daıyndaýǵa múmkindik beredi.
Kolej zamanaýı baspa mashınalary men tehnologıalarmen jabdyqtalǵan. Bul stýdentterge eńbek naryǵynda suranysqa ıe zamanaýı daǵdylardy meńgerýge múmkindik beredi.
Taqyrypqa oraı
Gúlzada ABDÝLLAEVA, Prıntmedıa tehnologıalar koleji dırektorynyń mindetin atqarýshy:
Biz elimizdiń jetekshi polıgrafıalyq kásiporyndarymen turaqty baılanys ornattyq. Bul qadam eń aldymen kolejdi bitirgen túlekterdiń jumysqa ornalasýyna zor yqpal etip otyr. Sonymen qatar, Germanıa, Belarýs, Reseı, Qytaı, Fransıa, Estonıa jáne Japonıanyń oqý oryndarymen belsendi túrde yntymaqtastyq ornatyldy. Bul rette aramyzda tájirıbe almasý jáne shetelde taǵylymdamadan ótý múmkindikteri ashyldy.
Qazirgi tańda qazaqstandaǵy polıgrafıa salasy zamanaýı tehnologıalyq úrdisterge beıimdele otyryp, jumysshy mamandyǵynyń qarqyndy damýyna úles qosyp jatyr. Prıntmedıa tehnologıalar koleji joǵary deńgeıde bilim berip, kásibı jumysshy kadrlardy qalyptastyrýǵa úlken úles qosyp otyr.