Memleket basshysy jumysshy mamandyqtardyń bedelin arttyrý, tehnıkalyq jáne kásiptik bilim berý júıesin reformalaý qajettigin aıtty jáne de jumysshy mamandyqtaryn dáripteý arqyly qoǵamda eńbekqor jáne naǵyz maman bolý ıdeıasyn nasıhattaýdy usynyp otyr.
Búginde elimizdegi ónerkásiptiń negizgi salalarynda mamandar tapshylyǵy aıqyn bilinedi. Qazirgi qoǵamda kóptegen jastar keńsede jumys isteýge nemese kásipker bolýǵa umtylady. Degenmen, jumysshy mamandyqtary árqashan suranysqa ıe ekenin ómirdiń ózi dáleldep otyr.
Tehnıkalyq mamandardy daıarlaýda kásiptik jáne tehnıkalyq bilim berý uıymdarynyń úlesi zor. Solardyń biri Almaty tehnologıa jáne florıstıka koleji jyl saıyn 400-deı jumysshy mamandy oqytyp, eńbek naryǵyna qajet bilikti mamandar daıyndap shyǵarady. Kolejde erekshe bilim berý qajettilikteri bar stýdentter de bilim alady. Atalmysh kolej alǵashqylardyń biri bolyp 1993 jyly erekshe bilim berý qajettilikteri bar stýdentterdi «Tigin óndirisi jáne kıimderdi úlgileý», «Esepteý tehnıkasy jáne aqparattyq jeliler», «Baq-saıabaq sharýashylyǵy», «Jıhaz óndirisi», «Aıaq-kıim isi» mamandyqtary boıynsha oqytyp, bilikti mamandar daıyndaı bastaıdy. Qazirgi tańda «Inklúzıvti bilim berý» bóliminde 211 stýdent oqyp jatsa, 173 stýdent arnaıy topta, 38 stýdent ınklúzıvti topta oqıdy.
«Inklúzıvti bilim berý» bóliminde bilikti mamandar stýdentterdiń sapaly bilim alýyna, tańdaǵan mamandyqtaryn ıgerýine degen barlyq kedergilerdi joıyp, qoǵamdyq ortaǵa áleýmettik beıimdelýin qamtamasyz etip otyr. Eńbek naryǵynda suranysqa ıe mamandar daıarlaý, stýdentterdiń quzyrettiligin arttyrý maqsatynda kolej pedagogtary qalalyq Bilim basqarmasynyń qoldaýymen Germanıa, Qytaı, Italıa, Golandıa, Ońtústik Koreıa, Túrkıa memleketteriniń oqý oryndarynda bolyp, halyqaralyq taǵylymdamadan ótip qaıtty. Olar osylaısha kásibı biliktilikterin arttyrady.
Taqyrypqa oraı
Anarbek NURYMBETOV, Almaty tehnologıa jáne florıstıka kolejiniń dırektory:
Úzdikter sapyndamyz
Qazirgi tańda kolejdiń materıaldyq-tehnıkalyq bazasy nyǵaıyp, modernızasıalaý jumystary júrip jatyr. Kolej «Jas maman» jobasy aıasynda elimizdegi «Eń úzdik 180 kolejdiń» biri atandy. Sonymen qatar, «100 suranysqa ıe mamandyq» baıqaýyna qatysyp, «Tigin óndirisi jáne kıimdi úlgileý» mamandyǵy boıynsha bilikti mamandar daıarlaýdyń halyqaralyq tájirıbesine enip otyr.
Almaty qalasynyń ákimdigi men Almaty qalasy Bilim basqarmasynyń ınvestor tartýynyń nátıjesinde «Altyn sapa ALM» JSHS kolejdegi erekshe bilim berýdi qajet etetin stýdentterge zamanaýı úlgide soǵylǵan oqý ǵımaraty salynyp, onda oqý ǵımaratyna kirý, shyǵý pandýstary, shaqyrý núkteleri, lıft-kótergish, arnaıy jolaqtar bar, munda Braıl shrıftimen taqtaıshalar arqyly kedergisiz júrip-turýǵa jan-jaqty jaǵdaı jasalǵan.