El ishi – óner kenishi.
Qaraǵandy oblysynyń Balqash qalasynda erekshe óner ıesi turady. 65 jastaǵy Iýrıı Vorobev úıiniń kireberisin plasıkalyq qaqpaqtarmen bezendirip qoıǵan, dep habarlaıdy Almaty-akshamy.kz Qazaqstan.tv-ǵa silteme jasap.
Eki qabatty turǵyn úıdiń kireberisi quddy ertegi álemindeı. Mundaǵy qabyrǵalar men edende túrli ertegi keıipkerlerin, ań men qustardyń beınesin kórýge bolady. Munyń barlyǵy da túrli-tústi qaqpaqtarmen jasalǵan. Turǵyndar jylda dálizdi sylap áýre bolmaıdy. Shańyn súrtip, jýyp alsa bolǵany.
«Iýra aǵaı bar, ózimiz osy kórshiler tatý-tátti ómir súremiz, qaqpaqtardyń ózin birge jınaımyz. Ony laqtyrý degendi bilmeımiz, ákelip beremiz. Barlyǵyn isteýdi biledi ǵoı ol kisi. Úıge qonaqqa kelgender podezdi kórip, qyzyǵyp, sýretke túsedi, áleýmettik jelige salady», – deıdi Balqash qalasynyń turǵyny Álibek Tasbolatov.
Iýrıı Vorobevtiń bul úıde turǵanyna 20 jyldan asyp ketken. Kireberisti bezendirý úshin 60 myń qaqpaq ketken. Oǵan zeınetker tórt jyl ýaqytyn arnapty.
«Zeınetke shyqqannan kezim pandemıaǵa tsúpa-tus keldi. Karantınde ishim pysqan soń ol plasıkalyq bótelkelerdiń qaqpaqtaryn jınap, olardan sýretter, kompozısıalar jasaı bastadym. Buryn jergilikti kombınatta dánekerleýshi bolyp jumys istedim. Men elektr júıesin, santehnıkany da ózim jóndeı beremin. Jas kezimde aǵash oıýmen aınalysqanmyn», – deıdi Balqash qalasynyń turǵyny Iýrıı Vorobev.
Balqashtyq sheber jubaıymen ekeýi serýenge shyqqanda qaqpaq jınaýdy ádetke aınaldyrǵan. Oǵan kórshileri men dostary da kómektesedi. Zeınetker óziniń ermegin qala tazalyǵyn saqtaýǵa tıtimdeı bolsa da úlesim dep sanaıdy. Búginde Iýrıı Vorobev turatyn úıdi jurt jaqsy biledi. Tipti, onyń erekshe qol týyndysyn kórýge arnaıy kelip, sýretke túsiretinder de kóp.
