Jetisý oblysynyń ákimi Beıbit Isabaev Qyzyltas jotasyndaǵy petroglıfterdiń qorǵaýǵa alynatynyn ýáde etti, dep habarlady óńir ákimdigi.
Buǵan deıin, Taldyqorǵan mańyndaǵy Qyzyltas jotasyndaǵy petroglıfterge baılanysty bastalǵan qaqtyǵys bir jylǵa jýyq ýaqyt boıy jalǵasyp kelgen bolatyn. Bul jerdegi tarıhı-mádenı muranyń saqtalýy men karerdi ıgerý jumystary qoǵamda úlken rezonans týǵyzdy. Jergilikti turǵyndar men belsendiler karerdi ıgerý barysynda tarıhı mańyzy bar petroglıfterdiń joıylýy múmkin degen alańdaýshylyqtaryn bildirdi. Ásirese, Temir jotasyndaǵy dıorıtti karerdi ıgerý osy daýdyń basty sebepteriniń biri boldy.
Belsendiler men ekologtar petroglıfterdiń tarıhı jáne mádenı qundylyǵyna nazar aýdartyp, jergilikti bılik pen qoǵamdy bul aımaqty qorǵaýǵa shaqyrdy. Jergilikti turǵyndar men qoǵam belsendileri birneshe ret narazylyq sharalaryn uıymdastyryp, karer ıgerý jumystarynyń toqtatylýyn talap etti.
Osy máseleniń mańyzdylyǵyna alańdap, QR Májilis depýtaty Janarbek Áshimjan 2023 jyly Úkimetke arnaıy depýtattyq saýal joldaǵan bolatyn. Ol Qyzyltas jotasyndaǵy petroglıfterdiń tarıhı jáne mádenı mańyzyna toqtala otyryp, olardyń joıylý qaýpi bar ekenin basa aıtyp ótti. Áshimjan saýalynda osy jerdegi petroglıfter men tarıhı muralardyń tek Qazaqstannyń ǵana emes, álemdik mádenı muranyń bir bóligi ekenin eskere otyryp, olardy tolyq qorǵaýǵa alý qajettigin talap etti. Depýtattyń pikirinshe, petroglıfterdi qorǵaý arqyly biz bolashaq urpaqqa tarıhı-mádenı muramyzdy saqtap jetkize alamyz.
Depýtattyń saýalynan keıin bul másele qoǵamdyq talqylaýǵa túsip, memleket tarapynan petroglıfterdi qorǵaýǵa baǵyttalǵan sharalar qolǵa alyndy. Jetisý oblysynyń ákimi Beıbit Isabaevtyń aıtýynsha, Temir jotasyndaǵy dıorıtti karerdi ıgerý jumystary resmı túrde toqtatyldy jáne petroglıfter men jaqyn mańdaǵy «Tasbaqa» taýynyń qorshaǵan ortasyn qorǵaý úshin arnaıy sharalar qabyldandy.
Isabaevtyń aıtýynsha, bul sheshim halyqtyń talaptaryna jaýap berip, ekologıalyq jáne tarıhı-mádenı qundylyqtardy qorǵaýǵa baǵyttalǵan.