Kez kelgen balany perishte desek bolady. Sebebi, olar qýlyq-sumdyqtan ada, júregi aq, oıy taza, kóńili de kirlenbegen. Ne oılaıdy, neni kórip tur, sony dál sol kúıinde boıamasyz, shynaıy aıtady.
Alataý aýdanyndaǵy «Shańyraq-2» shaǵynaýdanyndaǵy Elshamanova Aıgúl Mahanbetqalıqyzy jetekshilik etip otyrǵan «Shattyq» balabaqshasyna jolymyz túsken bolatyn. Ondaǵy tárbıeshi Rımma Aralbaıqyzynyń balalarymen, naqtyraq aıtsaq, «Samuryq» tobynyń baldyrǵandarymen tildestik.
Ózderi birinen-biri ótken sondaı súıkimdi. Tili tátti, armany asqaq búldirshinder ne aıtty, káne, birge oqıyqshy.
«Úlken úı satyp alamyn»
Nurıslam TUŃǴATAR:
Men jazdy asyǵa kútip júrmin. Jazda İnjý tátemniń sabaǵy bitip, demalysqa shyǵady. Sosyn meni kúreske aparyp, alyp keledi. Men bárin jeńemin de, kó-ó-p aqsha taýyp, úlke-e-n úı satyp alamyz. Atam men apamdy
aýyldan ákelip alamyz. Bárimiz birge turatyn bolamyz.
Ákem jaqynda mashınasyn satyp jiberdi. Basqa mashına tappaı jatyrmyz, ákeme unamaı qalyp jatyr. Biz aq mashına alamyz. Óıtkeni, aq mashınanyń júregi de aq bolady.
Anashym «jazda dalaǵa kóp shyǵýǵa bolmaıdy, kúnge kúıip ketesiń» deıdi. Keshe men kósheden qap-qara bolyp ketken (negr jigitti aıtyp otyr) aǵany kórdim. Ondaı qara bolǵym kelmeıdi, sondyqtan dalaǵa kóp shyqpaıtyn shyǵarmyn.
«Ánurandy jatqa bilemin»
Ardaq JUMAMURAT:
Maǵan kóktem men jaz mezgilderi unaıdy. Jasyl tústi jaqsy kóremin. Qysta sýyq, tońasyń. Al kóktemde kún jylynyp, adamdar jeńil kıinedi. Kún jyly bolǵandyqtan, oınaýǵa baramyz, batýtqa sekirgen kúshti. Kóbinese ata-anammen baramyn.
Úıdegiler meni «Adık» dep ataıdy. Balabaqshadaǵy apaılar men balalar da solaı ataıtyndyqtan, kóbi meniń shyn esimim solaı eken dep qalady.
Ánurandy jatqa bilemin. Óskende polısıa bolǵym keledi, biraq bul armanym ózgerip ketýi de múmkin.
Bizdiń balabaqshada taekvondo úıretedi, aǵaı sabaq beredi. Jaqynda ótken jarystan aıaǵymdy aýyrtyp aldym, sosyn oryn ala almaı qaldym. Aıtpaqshy, eki ápkem dalaǵa shyǵyp ketedi de, qaryndasym ekeýmizden tyǵylyp táttiler jep keledi. Ony papam men mamam bilip otyrady. Biraq uryspaıdy.
«Kúlip júrgen unaıdy»
Káýsar BOLATBEK:
Balabaqshaǵa sińlim ekeýmiz kelemiz. Sińlim bola tura, ata-anam meni qatty erkeletedi. Ákem meni moınyna otyrǵyzyp, aǵam aspanǵa laqtyrady, maǵan solaı etken qatty unaıdy. Balabaqshada barlyq qyzben dospyn.
Maǵan jyly bolyp turatyn mezgilder unaıdy. Qysta kóbinese aqqala jasaǵan kúnder ǵana unaıtyn sekildi. Kún jyly kezde jarqyraǵan kún shyǵyp, adamdar da kúle bastaıdy, endi jaqsy kóretin balmuzdaǵymdy da jıi jeıtin boldym.
Anamnyń kúrish tamaǵyn, sosyn laǵmanyn jaqsy kóremin. Dámdi pisiredi. Aq pen qara tústerdi unatamyn, ekeýi bir-birimen jaqsy úılesetin sekildi.
Men óskende dáriger bolamyn dep júrmin. Aýyryp qalǵan adamdardy emdep, kómekteskim keledi.
«Qyzdardy syılaý kerek»
Danıal MUSTAFIN:
Dostarymnyń kóbi balabaqshada. Biraq olarmen keıde tóbelesip te qalamyn. Ásirese, syrtqa oınaýǵa shyqqanda inime tıisken balany kórsem, júgirip baryp sol balany urǵym kelip turady. Biraq Rımma apaı bizge «báriń bir úıdiń balasyndaı dos bolyńdar, erteń mektepke ketip qalsańdar, sonda bir-birińdi saǵynasyńdar» deıdi ylǵı. Sosyn úndemeımin.
Balabaqsha beretin tamaqtardyń bári dámdi, ásirese maǵan palaý unaıdy.
Anam meni «janym bópem», «ózi júrek sıaqty» dep erkeletedi. Ol sózder meni qýantady.
Men jigit bolǵanda, dáriger bolsam deımin. Boksqa da qatysatyn shyǵarmyn.
Jaz shyqqanda gúlder ádemi, jaıqalyp ósedi, qyzdar da gúlder sıaqty ádemi. Qyzdardy renjitýge bolmaıdy, olardy syılaý kerek.
«Otanymdy da, otbasymdy da
qorǵaıtyn bolamyn»
Qaıyrjan JOLDASBEKOV:
Maǵan da jyly mezgilder, jyly kúnder unaıdy. Sebebi, ondaı kúnderi týystaryma qydyryp baramyn. Olar óte alysta turady. Jolda júrgen de unaıdy. Kóliktiń terezesinen dalaǵa qarap otyrǵan sondaı jaqsy.
Ata-anam meni «Qaırosh» deıdi. Balabaqshaǵa óte kishkentaı kezimnen bastap kelip júrmin. Apaılardyń aıtýynsha, men kóp sóılemeıtin, aıtqandy qylatyn bala bolyppyn, al qazir shamaly óskesin olaı emes ekenmin.
Ánurandy bárimiz jatqa bilemiz, balabaqshada kúnde tańerteń aıtamyz.
Óskende aǵalar sıaqty áskerge baramyn, Otanymdy qorǵaıtyn bolamyn. Otbasymdy da qorǵaımyn. Sosyn boksqa qatysqym keledi, ózimdi qorǵap júrý úshin.
«Gúlderdi julýǵa bolmaıdy»
Aılın SABIROVA:
Kóktem shyqsa, otbasymyzben qatty qýanamyz. Kún jylynǵan soń, syrtqa oınaýǵa ruqsat etedi. Aýlada da, balabaqshada da barlyq balamen dos bolǵandy jaqsy kóremin. Ursyspaý kerek. Oıynshyqqa talaspaý kerek.
Jaz mezgili tipti unaıdy. Ol kezde meniń kúnderim óte kóńildi ótedi. Kún jadyrap, balmuzdaǵymyzdy je-e-p, aýlada uzaq serýendeımiz.
Men úıdiń kenjesi bolǵandyqtan, úıdiń erkesimin. Ata-anama qatty erkeleımin. Gúlderdi jaqsy kóremin, olardy julýǵa bolmaıdy. Óıtkeni gúlderdiń de jany bolady eken, julyp alsań, jylap qalýy múmkin.
Menen siz sıaqty «óskende kim bolasyń?» dep suraıtyndar kóp. Men «Adam bolamyn» dep jaýap beremin. Shynymen jaqsy adam bolǵym keledi!
«Aýyl degen jaqsy»
Álıhan BEIDAHMET:
Biz aýylǵa bir jylda bir-aq ret baramyz. Onda da anam demalys alǵanda. Meniń anashym aspaz bolyp jumys isteıdi. Balalarǵa dámdi taǵamdar men túrli shyryndar daıyndaıdy.
Aýylǵa barýǵa asyǵyp turamyn. Aýyl degen jaqsy ǵoı. Bizdiń úıde sıyr, jylqy, qoılarymyz bar. Olardyń balalary da sondaı súıkimdi. Aýylǵa barsań raha-at qoı, qurt, maı jep, aıran, sút ishesiń. Onyń bári adamǵa paıdaly deıdi, kóp ishseń, myqty jigit bolyp ósesiń. Men myqty bolyp óssem, Otanymdy qorǵaıtyn sarbaz bolamyn.
Bizge aǵylshyn tilin úıretip jatyr. Bıyl balabaqshamen qoshtaspaıtyn boldym, áli bir jylym bar eken.
«Ol biz úshin qashanda bıik»
Aısultan BAIANBAI:
Men bıyl balabaqshamen qoshtasamyn. Saǵynatyn bolamyn. Maǵan balabaqshanyń kúrish sorpasy unaıdy, biraq barlyq tamaǵy dámdi.
Keshke úıge barǵanda, qyzdardyń ortasyndaǵy jalǵyz ul men bolǵandyqtan, ákem meni «Arystanym» dep erkeletedi. Ákemniń úmitin aqtaǵym keledi. Jaqsy oqýshy bolamyn, áskerge baramyn.
Qaırat Nurtastyń ánderin tyńdaǵan unaıdy.
Bizdiń Prezıdentimiz – Qasym-Jomart Toqaev degen ata. Ol bárimizdi basqaryp otyr. Astanada Báıteregimiz bar, ol biz úshin qashanda