Aqtóbe oblysynda bilim berý uıymdary basshylarynyń ústinen shaǵym túsiretinder kóbeıgen
Aqtóbe oblysynda ádep normalaryn saqtamaǵan muǵalimderge eskertý berilip, pedagogtardyń quqyqtaryn buzǵany úshin bir bilim berý uıymynyń basshysyna ákimshilik jaza qoldanyldy, dep habarlaıdy Almaty-akshamy.kz Baq.kz-ke silteme jasap.
Aqtóbe oblystyq bilim salasynda sapany qamtamasyz etý departamenti basshysynyń orynbasary Janar Muhambetalınanyń aıtýynsha, mektep basshysynyń ústinen muǵalim shaǵym túsirgen.
«Pedagogtan túsken shaǵym boıynsha mektep dırektory Qazaqstan Respýblıkasy «Ákimshilik quqyqbuzýshylyq týraly» Kodeksiniń 409-baby 7-3 tarmaǵynyń 1-tarmaqshasy «Qazaqstan Respýblıkasynyń zańdarynda kózdelgen jaǵdaılardy qospaǵanda, pedagogti kásiptik mindetterimen baılanysty emes jumys túrlerine tartý» jáne osy Zańnyń 409-babynyń 7-3 tarmaǵy 4-tarmaqshasy «Pedagogke taýarlar men kórsetiletin qyzmetterdi satyp alý boıynsha mindetti júkteý» boıynsha ákimshilik quqyqbuzýshylyq jasaǵany úshin aıypty dep tanylyp, eskertý berildi. Odan bólek, bilim berý uıymynyń basshylary men pedagogtaryna ádep normalaryn jáne pedagog quqyqtaryn buzǵany úshin 4 eskertý berilip, 2 tártiptik shara qoldanyldy. Al eki bilim berý uıymynyń basshysyna eskertý jasaldy»,— deıdi ol.
Sońǵy kezde oblysta bilim berý uıymdary basshylarynyń ústinen shaǵym túsiretinder kóbeıgen. Ásirese, áleýmettik jeliler arqyly pedagog quqyqtarynyń buzylýyna baılanysty shaǵymdar kóp joldanady eken.
«Osy oraıda biz muǵalimder arasynda aqparattyq-túsindirý jumystaryn júrgizý úshin WhatsApp messendjerinde 14 chat qurdyq. Bul jerge pedagogtar óz ótinishteri men shaǵymdaryn jaza alady. Jalpy, Bilim jáne ǵylym mınıstriniń «Pedagog quqyqtarynyń buzylýyna jol bermeý» týraly buıryǵyna sáıkes, pedagogterdi qosymsha jumys túrlerine tartýǵa, zańsyz tekserýler júrgizýge, oqýǵa qajetti qandaı da bir taýardy satyp alýyna mindetteýge jol berilmeıdi. Eger osyndaı talaptar buzylǵan jaǵdaıda ustazdar bizdiń departamentke júginýlerine bolady. Departament tekserý jumystaryn júrgizip, qatań sharalar qabyldaıtyn bolady», — deıdi Aqtóbe oblystyq bilim salasynda sapany qamtamasyz etý departamenti basshysynyń orynbasary.
Jýyrda Aqtóbe oblysyndaǵy 42 bilim berý uıymyna, atap aıtsaq, 28 mektep, 12 balabaqsha jáne 2 kolejge memlekettik attestasıa jumystary júrgizildi. Ókinishke qaraı, olardyń eshqaısysy atestattalmady. Biz departament basshysy orynbasarynan bilim berý uıymdarynyń ne sebepti atestattalmaǵanyn suradyq.
«Buǵan atalǵan bilim berý uıymdaryndaǵy 4, 9 jáne 11-synyp oqýshylarynyń test synamalarynan óte almaýy sebep bolyp otyr. Iaǵnı, bilim sapasy tómen degen sóz. Osy oraıda biz 16 tekseris júrgizdik. Nátıjesinde úsh zańdy tulǵaǵa, úsh laýazymdy tulǵaǵa ákimshilik shara qabyldandy, 4 adamǵa nusqama berildi», — deıdi Janar Muhambetalına.