Import almastyrýǵa baǵyttalǵan 700 mańyzdy ınvestısıalyq joba daıarlandy
Prezıdent Indýstrıa jáne ınfraqurylymdyq damý mınıstri Qaıyrbek Óskenbaevty qabyldady, dep habarlaıdy Almaty-akshamy.kz Aqordanyń baspasóz qyzmetine silteme jasap.
Memleket basshysyna mınıstrliktiń jyl basynan beri atqarǵan jumystary týraly egjeı-tegjeıli esep berildi.
Prezıdentke qańtar oqıǵasy kezinde zardap shekken nysandardy qalpyna keltirý úshin qabyldanǵan sharalar týraly baıandaldy. Mınıstrlik sońǵy 3 jylda paıdalanýǵa berilgen turǵyn úılerge tekseris júrgizip, statısıkalyq derekterdi anyqtady. Básekelestikti qorǵaý jáne damytý agenttigimen birlesip, qurylys naryǵyn monopolıadan aryltý jáne onyń básekege qabilettiligin arttyrý jóninde sharalar toptamasyn ázirledi. Sondaı-aq baspanasy joq, jaǵdaıy nashar azamattardy qoldaýǵa baǵyttalǵan jańa memlekettik turǵyn úı baǵdarlamasy iske qosyldy. Búginge deıin atalǵan baǵdarlama boıynsha 2,5 myń ótinim maquldandy.
Mınıstrdiń aıtýynsha, ónerkásip salasynda ımport almastyrýǵa baǵyttalǵan 700 mańyzdy ınvestısıalyq joba daıarlanǵan. Arnaýly ekonomıkalyq aımaqtar jumysynyń tıimdiligin arttyrý jóninde sheshimder qabyldanǵan. Paıdaly qazbalar ken oryndarynyń bárine tekseris júrgizilgen. Qazirgi ýaqytta 118 lısenzıanyń qyzmeti toqtatylǵan. 57 kelisimshart úzilgen. Jer qoınaýyn paıdalanýshylarǵa olqylyqtardy joıý úshin 73 eskertpe joldanǵan. Taý-ken jáne metalýrgıalyq kásiporyndarmen birlesip, orta jáne joǵarǵy shekteýli óńdeýshi ónimder óndirisin órkendetý úshin keshendi sharalar ázirlengen.
Sonymen qatar mınıstrlik elimizdiń tranzıttik áleýetin arttyrý jáne keden logıstıkasy salasyna iri halyqaralyq kompanıalardy tartý úshin aýqymdy jumystar júrgizdi.
Qaıyrbek Óskenbaev respýblıkalyq mańyzy bar avtojoldardy jańǵyrtý, jóndeý jáne salý jumystaryna da arnaıy toqtaldy.
Prezıdent elimizdiń kúre joldary qurylysyna qatysty máseleniń strategıalyq mańyzy bar ekenin atap ótip, onyń aıryqsha baqylaýda bolatynyn eske saldy. Sonymen qatar Qasym-Jomart Toqaev kórshiles memlekettermen ekonomıkalyq yntymaqtastyqty damytý qajet ekenine nazar aýdaryp, mınıstrge birqatar naqty tapsyrma berdi.