Apany qyzy es-tússiz kúıde taýyp, jedel járdem brıgadasyn shaqyrǵan
Tórtinshi qalalyq aýrýhana dárigerleri serebraldy ınfarktpen túsken 80 jastaǵy naýqasty aman alyp qaldy, dep habarlaıdy Almaty-akshamy.kz.
Aýrýhanada 8 kún em alǵan Báıimbetova Zada apa saýyǵyp úıge shyqqaly jatyr.
«Qyzyma qonaqqa Qyzylordadan keldim. Kenet jaǵdaıym nasharlap, qol-aıaǵym ustamaı, shuǵyl túrde osy aýrýhanaǵa tústim. Jaqsy dárigerlerdi kezdestirgenim úshin jaratqanǵa alǵysym sheksiz. Otadan keıin qol-aıaǵym qaıtadan durys isteıdi, óz betimmen júre alamyn, qolymdy kótere alamyn. Aýrýhana ujymyna myń alǵys», – deıdi Zada Janádilqyzy.
Naýqasty mamyrdyń 15-inde №4 qalalyq klınıkalyq aýrýhananyń qabyldaý bólimshesine jedel járdem brıgadasy alyp keldi. Naýqas sóıleý qabiletiniń buzylýyna, bet asımetrıasyna, sol jaq aıaq-qoldarynyń álsizdigi men uıýyna, jalpy álsizdikke shaǵymdandy.
Apany qyzy es-tússiz kúıde taýyp, jedel járdem brıgadasyn shaqyrǵan, naýqas 12 mınýt ishinde №4 qalalyq klınıkalyq aýrýhananyń nevrologıa bólimshesiniń qabyldaý bólimine jetkizilgen. Ony nevropatolog, ınternolog, reanımatolog, neırohırýrg birlesip tekserdi. Naýqas shuǵyl túrde jansaqtaý bólimine jatqyzyldy.
Dıagnozy: mı arterıalarynyń trombozynan týyndaǵan serebraldy ınfarkt. Oń jaq ortańǵy mı arterıasynyń baseınindegi ıshemıalyq túrdegi jedel serebrovaskýlárlyq buzylýy.
«Naýqas aýyr jaǵdaıda tústi, oń jaq ortańǵy mı arterıasynyń baseınindegi ıshemıalyq túrdegi jedel serebrovaskýlárlyq buzylýy. Emdeý taktıkasyn tańdaǵan kezde naýqastyń jasyn eskerdik. Klınıkalyq dıagnostıkalyq jáne zerthanalyq zertteýler júrgizildi, onyń ishinde bas mıǵa KT, qan tamyrlaryn últradybystyq zertteý, rentgen, EKG jasaldy. Terapevt, kardıolog, neırohırýrg, anestezıolog-reanımatolog mamandar naýqasty qarap shyqty. Ota jasaý sheshimi qabyldandy: bas jáne moıyn tamyrlarynyń obstrýksıasyn endovaskýlárlyq joıý – selektıvti serebraldy angıografıa jasaldy. Oń jaq ortańǵy mı arterıasynyń M1 segmentindegi trombtardy bir mezgilde tromboaspırasıalaýmen (saqtaý tehnıkasy) rentgendik endovaskýlárlyq mehanıkalyq tromboekstraksıa jasaldy», - deıdi №4 qalalyq klınıkalyq aýrýhananyń neırohırýrgıa bólimshesiniń meńgerýshisi Nurjan Ájibekov.
Ota 50 mınýtqa sozyldy.
Hırýrgtar: Nıkatov Qýanysh Ábýeuly, Aısaýtov Aldonǵar Bahtıaruly.
Anestezıolog: Jumabaeva Kamshat Seıdahanqyzy.
Otadan keıin jaǵdaıy turaqtalǵansha Zada apa jansaqtaý bóliminde kezekshi medısına qyzmetkerleriniń qatań baqylaýynda boldy. Jaǵdaıy turaqtalǵannan keıin odan ári emdelý úshin neırohırýrgıa bólimine aýystyryldy.
«8-kúni naýqastyń jaǵdaıy jaqsaryp, úıge shyǵaryldy. Naýqastyń oń dınamıkasyn atap ótkimiz keledi - ol ornynan turyp, palata ishinde júrdi», - dep qorytyndylady emdeýshi dáriger Aısaýtov Aldoǵar Baqtıaruly.