İshki ister mınıstrligi Pavel Dýrovtyń Kólsaı kólinde shomylýyna baılanysty jaýapkershilik máselesin Qazaqstannyń Ekologıa jáne tabıǵı resýrstar mınıstrligi sheshetinin málimdedi, dep habarlaıdy Aqshamnews.kz Tengrinews.kz tilshisine silteme jasap.
Ne jaǵdaı boldy?
"VKontakte" men Telegram messendjeriniń negizin qalaýshy Pavel Dýrov Kólsaıda sýǵa shomylyp, jeli qoldanýshylarynyń narazylyǵyn týdyrǵan vıdeo jarıalady. "Kólsaı kólderi" ulttyq parkinde bul sýda shomylýǵa tyıym salynǵany aıtylyp, qyzmettik tekseris bastalǵany habarlandy.
Ulttyq parktiń tabıǵı keshenderdi qorǵaý jáne kóbeıtý bóliminde belgilengen erejelerdi buzǵany úshin 10 aılyq eseptik kórsetkish mólsherinde aıyppul qarastyrylǵany, 2025 jyly onyń kólemi 39 320 teńge ekenin ataldy.
İİM ne deıdi?
İİM Ákimshilik polısıa komıteti tóraǵasynyń orynbasary Alekseı Mılúk tyıym salynǵan aımaqtaǵy shomylýǵa qatysty jaǵdaıdy túsindirip, bul másele boıynsha jaýapkershilikti Ekologıa mınıstrligi aıqyndaıtynyn málimdedi.
"Tyıym salynǵan aımaqta shomylý erekshe qorǵalatyn tabıǵı aýmaqta bolǵan jaǵdaı. Osy aımaqta shomylýǵa qatysty jaýapkershilik, sondaı-aq hattama jasaý jáne aıyppul salý Ekologıa mınıstrliginiń quzyretine jatady. Biz tıisti materıaldy tirkep, vedimistik áreket boıynsha jiberdik. Qazir olar isti qarap jatyr", - dedi Alekseı Mılúk.
Onyń aıtýynsha, İİM qyzmetkerleri bul fakti boıynsha ákimshilik materıaldar rásimdemegen, tek BAQ-ta jarıalanǵan málimetterdi jınap, ekologıalyq vedomstvoǵa joldaǵan.
"Bizdiń quzyret - qoǵamdyq tártipti saqtaý, jol qaýipsizdigi, balyq jáne orman sharýashylyǵy máseleleri. Ár memlekettik organnyń ákimshilik hattama jasaý boıynsha óz quzyreti bar. Bul jaǵdaıda quzyret ekologıalyq organdarǵa tıesili", - dep naqtylady ol.
Aıyppul mólsherine qatysty İİM ókili bári quqyqbuzýshylyqtyń saralanýyna baılanysty bolatynyn aıtty: "Qalaı saralanatynyn qaraý kerek. Eń tómeni - eskertýden, qatelespesem, 10 AEK-ke deıin bolady", - dedi maman.
Eske salaıyq, buǵan deıin Pavel Dýrov Almaty oblysyndaǵy Kólsaı kólinde sýǵa túsken vıdeosyn jarıalaǵan edi.