2025 jyldyń 9 qazanda Almaty qalalyq Bilim basqarmasynyń qoldaýymen Almaty sán jáne qyzmet kórsetý salasy kolejinde «Jeke qaýipsizdik sabaqtary» atty qalalyq semınar-praktıkým ótti. İs-sharany kolej dırektorynyń oqý-tárbıe isi jónindegi orynbasary Omarova Kúnimaı Nurlybaevna uıymdastyrdy, - dep habarlaıdy Aqshamnews.kz tilshisi.
Semınar-praktıkýmnyń maqsaty — jasóspirimderdiń ártúrli ómirlik jaǵdaılarda qaýipsiz minez-qulyq daǵdylaryn qalyptastyrý, óz ómiri men densaýlyǵyna jaýapkershilikpen qaraýǵa úıretý, quqyqtyq saýattylyqty arttyrý, sondaı-aq erte júktiliktiń jáne quqyq buzýshylyqtyń aldyn alý máselelerin talqylaý boldy.
İs-sharany Almaty sán jáne qyzmet kórsetý salasy kolejiniń dırektorynyń oqý isi jónindegi orynbasary Uıabaeva Gúlzıra Jaqsylyqovna ashyp berip, qatysýshylarǵa sáttilik tiledi. Almaty qalalyq Bilim basqarmasynyń qalalyq bilim berýdegi jańa tehnologıalardyń ǵylymı-ádistemelik ortalyǵynyń ádiskeri Smaǵulova Gúlhan Álimhanovna alǵys sózin bildirdi.
Semınarǵa Almaty qalasy Polısıa departamentiniń Jergilikti polısıa qyzmeti basqarmasynyń Iývenaldy polısıa bóliminiń aǵa ınspektory, polısıa maıory Beısenova Zarına Nurbaevna, Tótenshe jaǵdaılar departamentiniń ınjeneri, aǵa leıtenanty Toıboldın Ernur Qaıratuly, QAJ departamentiniń №11 mekemesiniń rejım bóliminiń basshysy Jumadılov Erdoc Baǵıbaevıch, sondaı-aq Jastar jáne otbasy ortalyǵynyń bólim meńgerýshisi Ábdiqadyrova Aıakóz Dáýlethanqyzy qatysty.
Semınar barysynda qatysýshylar óz salalary boıynsha mańyzdy aqparattarmen bólisip, jastarǵa arnalǵan túsindirý jumystaryn júrgizdi. Kolejdiń oqý-ádistemelik jumysy jónindegi orynbasary, psıholog, relıv-terapevt Aganına Galına Vıktorovna «Kóshbasshynyń tıimdi qarym-qatynasy: tárbıe jumysy júıesindegi tranzaksıalyq taldaý» taqyrybynda baıandama jasady. Al top kýratory Munataeva Aıgúl Amangeldıevna «Qaýipsizdik mádenıetin tárbıeleýdegi bilim alýshylar men ata-analardyń róli» atty taqyrypta qundy aqparat usyndy.
İs-shara joǵary deńgeıde uıymdastyrylyp, qatysýshylar ózara tájirıbe almasty. Qonaqtar tarapynan qoıylǵan suraqtarǵa tolyqqandy jaýaptar berildi. Sonymen qatar semınar baǵdarlamasy aıasynda qatysýshylardyń kóńilin kóterý maqsatynda teatr jetekshileri Baımýratova Ásemgúl Kerimbaevna jáne Ádilbek Uljan Bektemirqyzynyń jetekshiligimen «Balanyń quqyqtary men mindetteri: zańdy kózqaras jáne qoǵamdaǵy jaǵdaı» atty sahnalyq kórinis qoıyldy.
Kórermender kolej stýdentteriniń bı ónerin tamashalap, jaǵymdy ásermen tarasty. Semınar sońynda qatysýshylar osyndaı mazmundy is-sharalardyń jastardyń qaýipsizdik mádenıetin arttyrýdaǵy mańyzdylyǵyn erekshe atap ótti.
Almaty sán jáne qyzmet kórsetý
salasynyń pedagog-psıhologi Sholpanbaeva S.N.