Qujatta memleket basshysynyń ókilettiligin qysqartý, saılaý júıesin ózgertý jáne taǵy basqa mańyzdy máseleler bar.
Senat depýtattary prezıdenttiń naýryz aıyndaǵy joldaýyn iske asyrýdy kózdeıtin zańdy qabyldady, dep habarlaıdy Almaty-akshamy.kz
Osy zańmen 8 birdeı konstıtýsıalyq zańyna ózgeris engizilip otyr. Prezıdent týraly zańda buǵan deıin aıtylǵan bastamalar bekitiledi. Olar:
prezıdent úshin saıası partıalarǵa múshe bolýǵa shekteý qoıý;
prezıdenttiń jaqyn týystaryna saıası memlekettik qyzmetshiler, kvazımemlekettik sektor sýbektileriniń basshylary laýazymdaryna ornalasýǵa shekteýler engizý;
senat depýtattaryn, konstıtýsıalyq sot jáne joǵary sot keńesi tóraǵalaryn taǵaıyndaý jónindegi ókilettikterdi ózgertý;
Parlamentke qatysty ózgerister:
Senatty qalyptastyrý tártibin jáne onyń birqatar fýnksıasyn qaıta qaraý;
aralas saılaý júıesin engizý;
májilistegi Qazaqstan halqy assambleıasynyń kvotasyn alyp tastaý;
parlament palatalarynda zańdardy qaraý jáne qabyldaý tártibin qaıta qaraý.
«Saılaý týraly» konstıtýsıalyq zańǵa engiziletin túzetýler:
májilis pen máslıhattar depýtattaryn majorıtarlyq júıe boıynsha saılaý;
majorıtarlyq júıe boıynsha saılanǵan májilis pen máslıhattar depýtattaryn keri shaqyrtyp alý;
aýdandar men oblystyq mańyzy bar qalalardyń ákimderin saılaý;
aýmaqtyq saılaý komısıalaryn kásibı negizge aýystyrý;
saılaý aldyndaǵy áleýmettik jelilerdegi úgit-nasıhatty júrgizý;
saılaý qorlaryna beriletin qaıyrymdylyqtardyń shekti mólsheri;
saılaý naýqanyna qatysýshylardyń qarjylyq ashyqtyǵyn qamtamasyz etý;
saılaýǵa sheteldik aralasýǵa jol bermeý;
saıası partıany tirkeýge qajetti adam sanyn 5 myńǵa deıin azaıtý;
saıası partıany tirkeý úshin aımaqtyq ókilderdiń sanyn 200 adamǵa deıin qysqartý;
saıası partıany qurý úshin bastamashyl toptaǵy adamdardyń sanyn 700-ge deıin azaıtý.
Budan bólek, zańda prezıdenttiń qaıta saılaý quqyǵynsyz ókilettik merzimine qatysty máseleni referendýmǵa shyǵarýǵa tyıym salynady.