Keshe túnde Parıjde 17-shi jazǵy Paralımpıadanyń shymyldyǵy resmı túrde túrildi.
Saltanatty is-shara Fransıanyń Kelisim alańynda ótti. Ashylý saltanatynda Qazaqstan týyn voleıboldy otyryp oınaýdan ulttyq qurama múshesi Berik İzmaǵanbetov pen para nysana kózdeýden Sevda Alıeva ustap shyqty, dep habarlaıdy aqshamnews.kz.
Jazǵy Paralımpıada básekesi Fransıa astanasynda alǵash ret ótkizilip otyr. Jarysqa 4400-den astam sportshy qatysady. Olarǵa 2500 adam kómektesedi. Saıys baǵdarlamasyna 22 sport túri men 549 dısıplına engen. Al oıyndar 11 kúnge jalǵasady.
Bıylǵy baǵdarlamaǵa jańa sport túrleri qosylmaǵan. Alaıda Tokıo-2020 oıyndarynyń baǵdarlamasyna engen para badmınton qaıta usynylyp otyr. Parıjdegi Paralımpıadaǵa Qazaqstan quramasynan 44 sportshy synǵa túsedi. Bul – el tarıhyndaǵy rekordty kórsetkish.
Tokıo-2020 oıyndarynda el namysyn 26 sportshy qorǵaǵan bolatyn. El sportshylary oıyndarǵa 1996 jyldan beri turaqty túrde qatysyp keledi.
Bıylǵy Paralımpıadada Qazaqstan ulttyq quramasynyń sportshylary 9 sport túrinen (para dzúdo, para paýerlıftıng, para taekvondo, para jeńil atletıka, para nysana kózdeý, para ústel tenısi, para júzý, para kanoe jáne voleıboldy otyryp oınaý) synǵa túsedi. Osy jyly qazaqstandyq sportshylar para ústel tenısinen jáne áıelder arasynda para kanoeden alǵash ret Paralımpıada lısenzıasyn jeńip aldy.
El sportshylary búginnen bastap jarys jolyna shyǵady. 29 tamyzda Mılana Krasavseva para taekvondodan óner kórsetedi, al keshke voleıboldy otyryp oınaýdan Qazaqstan quramasy Fransıamen sheberlik baıqasady.