Azamattarǵa halyqqa qyzmet kórsetý ortalyǵynyń qyzmetkerin úıge shaqyrýǵa múmkindik beretin jańa servıs iske qosyldy. Belgilengen ýaqytta maman kórsetilgen mekenjaı boıynsha kelip, memlekettik qyzmetti kórsete alady. Menedjerdiń mundaı qyzmetti kórsetkeni úshin 7 190 teńge tóleýińiz tıis, dep habarlaıdy aqshamnews.kz.
HQKO-dan tys jerde menedjerler tólqujat, jeke kýálik, júrgizýshi kýáligin alý jáne kólik quraldaryn tirkeý jónindegi qyzmetterdi qospaǵanda memlekettik qyzmet túriniń kez kelgenin kórsete alady.
Pılottyq joba Qazaqstannyń barlyq óńirinde iske qosyldy. Servısti paıdalaný úshin Memlekettik korporasıanyń resmı saıtynda «jeke menedjerdi úıge shaqyrý» batyrmasyn basyp, qajetti málimetterdi toltyrý qajet.
Sondaı-aq ótinimderdi 1414 biryńǵaı baılanys ortalyǵy arqyly da berýge bolady. «Azamattarǵa arnalǵan úkimet» mamandary málimetterdi naqtylaý maqsatynda jáne menedjerdiń kelý ýaqytyn belgileý úshin qyzmet alýshymen baılanysqa shyǵady.
- Memlekettik korporasıa turaqty túrde servısterdi jetildirý úshin jumys júrgizip jatyr. Buǵan deıin biz jeke menedjerler arqyly HQKO-da basym kezek arqyly qyzmet alý múmkindigin iske asyrǵan edik. Endi halyqqa qyzmet kórsetý ortalyqtarynyń mamandaryn úıge shaqyrtyp, qyzmetti úıden shyqpaı-aq alýǵa bolady. Bul ýaqyt únemdegisi keletin azamattar úshin óte yńǵaıly servıs, - dedi «Azamattarǵa arnalǵan úkimet» Basqarma Tóraǵasy Arman Kenjeǵalıev.