Parıjde IýNESKO-nyń shtab-páterinde belgili jazýshy, qazaq balalar ádebıetiniń klassıgi Berdibek Soqpaqbaevtyń 100 jyldyǵyna arnalǵan konferensıa ótti.
İs-shara aıasynda «Meniń atym Qoja» kitabynyń fransýz tiline aýdarylǵan nusqasynyń tusaýkeseri uıymdastyryldy, dep habarlaıdy aqshamnews.kz Mádenıet jáne aqparat mınıstrligine silteme jasap.
Konferensıaǵa IýNESKO Bas dırektorynyń orynbasary Ernesto Ottone, Qazaqstan Respýblıkasy Mádenıet jáne aqparat mınıstrliginiń Arhıv, qujattama jáne kitap isi komıtetiniń tóraǵasy Rýstam Álı, Qazaqstan Jazýshylar odaǵynyń tóraǵasy Mereke Qulkenov jáne TÚRKSOI halyqaralyq uıymyndaǵy Qazaqstan ókili Baqytjan Omar qatysty.
Qatysýshylar Berdibek Soqpaqbaev kitabynyń aýdarmasy fransýz oqyrmandaryna qazaq mádenıetin tanytyp, Qazaqstan halqynyń baı dástúrleri men qundylyqtaryn ashatynyna senim bildirdi.
Berdibek Soqpaqbaevtyń 100 jyldyǵynyń IýNESKO-nyń ataýly datalar kúntizbesine engizilýi onyń álemdik mádenıetke qosqan úlesiniń mańyzdylyǵyn kórsetedi. 1952 jyldan bastap Qazaqstan Jazýshylar odaǵynyń múshesi bolǵan qalamger kózi tirisinde-aq qazaq balalar ádebıetiniń klassıgi retinde tanyldy. Balalardyń ǵana emes, eresekterdiń de súıikti jazýshysyna aınalǵan onyń shyǵarmashylyǵy urpaq tárbıesinde áli kúnge ózektiligin joımaı keledi.
Qazaqstan tarapy IýNESKO-ǵa is-sharany uıymdastyrýdaǵy qoldaýy úshin alǵys bildirip, qazaq halqynyń murasyn halyqaralyq arenada nasıhattaıtyn mádenı is-sharalardyń mańyzdylyǵyn atap ótti.