Shymkent qalasynda Ortalyq Azıa elderi men túrkitildes memleketteriniń teatr óneri salasyndaǵy yntymaqtastyq pen dostyq baılanystardy nyǵaıtý sheńberindegi IX Halyqaralyq teatr festıvaliniń ashylý saltanaty ótti, dep habarlaıdy aqshamnews.kz.
J. Shanın atyndaǵy Shymkent qalalyq akademıalyq qazaq drama teatrynyń 95 jyldyǵyna arnalǵan festıváldi Mádenıet komıtetiniń tóraǵasy Kúmis Seıitova ashyp, Qazaqstan Respýblıkasy Mádenıet jáne aqparat mınıstriniń quttyqtaýyn oqyp berdi.
«Sizderdi teatrdyń 95 jyldyq mereıtoıymen shyn júrekten quttyqtaımyn. Qazaqtyń ulttyq kásibı teatr óneriniń negizin salýshy Jumat Shanınniń esimin ıelengen óner ordasynyń ult rýhanıatyn damytýda alatyn orny bıik. Ǵasyrǵa jýyq tarıhy bar teatr ár jyldary talaı sahna sańlaǵynyń baǵyn ashty, baǵytyn aıqyndady. Bul óner qara shańyraǵynda halqymyzdyń birtýar talanttary Hadısha Bókeeva, Ámına Ómirzaqova eńbek etken. Qazaq drama teatry búgingi tańda kórermenin sapaly qoıylymdarmen qýantyp, taǵylymy mol, talǵamy bıik týyndylar sahnalaýda», – delingen quttyqtaý hatta.
Alty kún boıy Qyrǵyzstan, Ózbekstan, Túrkıa, Qaraqalpaqstan, Tatarstan, Ázirbaıjan jáne Qazaqstan teatrlarynyń úzdik spektáklderi kórsetiledi. Festıvál baǵdarlamasynda spektáklderdi talqylaý úshin jetekshi teatr synshylary qatysatyn dóńgelek ústelder, sondaı-aq, shetel pedagogtary ótkizetin teatr rejıserleri, akterleri men menedjerlerine arnalǵan sheberlik saǵattary josparlanǵan.
İs-shara 11 qarashaǵa deıin jalǵasady.