Premer-Mınıstr Oljas Bektenovtiń tóraǵalyǵymen ótken Úkimet otyrysynda atom energetıkasyn damytý máseleleri boıynsha Qazaqstanda AES salý ıdeıasyna qatysty sarapshylardyń pikirleri tyńdaldy, dep habarlaıdy aqshamnews.kz
«Qazaqstandyq atom elektr stansalary» kompanıasynyń basshysy Tımýr Jantıkınniń aıtýynsha, bul másele elimizde elektr energıasynyń boljamdy tapshylyǵy aıasynda qaýipsiz ári ekologıalyq atom energıasyn damytý jónindegi Memleket basshysynyń tapsyrmasy aıasynda qaralýda.
«Atom elektr stansasyn salý máselesi toqsanynshy jyldardan beri qarastyrylyp keledi. Qazir energıa tapshylyǵy jáne jumys istep turǵan qýattardyń tozý kórsetkishi artqan jaǵdaıda ol qaıtadan ózekti bolyp otyr. Bul jerde atom elektr stansalary álemdegi eń qaýipsiz ári eń senimdi energıa kózderine jatatynyn atap ótken jón», — dep málimdedi «Qazaqstandyq atom elektr stansalary» kompanıasynyń basshysy.
Júrgizilgen zertteýlerden keıin III jáne III+ býyndarynyń sý-sý reaktorlary eń qolaıly bolyp tańdaldy. Mundaı reaktorlarda bir-birin birneshe dúrkin qaıtalaıtyn belsendi jáne pasıvti qaýipsizdik júıeleri bar. Olar tereń eshelondalǵan apatqa qarsy qorǵanys dep atalady. Qazirgi reaktorlarda shtattan tys jaǵdaıdyń paıda bolý yqtımaldyǵy óte tómen. Biraq ondaı jaǵdaıda da qaýipsizdik júıeleri onyń yqtımal saldaryn beıtaraptandyrady.
Búgingi tańda usynylǵan 13 jobanyń ishinde Qytaı, Koreıa, Reseı jáne Fransıadan 4 áleýetti jetkizýshi short-tizimge engizilgen. Sonymen qatar jobanyń shamamen quny jáne ony salý merzimi týraly túsinik qalyptastyryldy.
«Obektıvti shyndyq – Qazaqstannyń bolashaǵy atom energetıkasymen tyǵyz baılanysty», — dedi T. Jantıkın.
Referendým qorytyndysy boıynsha oń sheshim qabyldanǵan jaǵdaıda atom tehnologıasynyń naqty jetkizýshisin tańdaý jáne jobanyń TEN-in birlesip ázirleý kelesi mańyzdy mindet bolmaq.