Davıd Degtárev: «Jeńisimdi tamasha elime arnaımyn»
Aqmola oblysynyń ákimi Ermek Marjyqpaev Tokıo Paralımpıadasynan jeńispen oralǵan aqmolalyq parapaýerlıfter Davıd Degtárevka jańa páter men kóliktiń kiltin tapsyrdy, dep habarlaıdy Almaty-akshamy.kz
Aımaq basshysy Ermek Marjyqpaev quttyqtaý sózinde óńirde sport salasy qarqyndy damyp kele jatqanyn, buqaralyq sportty damytý úshin birqatar sharýalar tyndyrylyp jatqanyn atap ótti. «Sport salasynda 2 myńnan astam maman eńbek etedi. Óńirdiń qalalary men aýyldarynda 2,5 myń sport nysanynda 240 myńnan astam áýesqoı sportshylar jattyǵady. Davıd Degtárev aqmolalyq atletterdiń dańqty jeńisteri jylnamasynda laıyqty oryn aldy. Biz onyń jetistigin maqtan tutamyz jáne zor densaýlyq pen tabys tileımiz», – dep atap ótti Ermek Boranbaıuly.
E.Marjyqpaev chempıonǵa kóliktiń kiltin jáne 3 bólmeli jańa páterdiń sertıfıkatyn tabys etti. Al, onyń jattyqtyrýshysy Iýrıı Kolesnıkov 5 mıllıon teńge aldy. «Men jeńisimdi tamasha elime arnaımyn», - dedi qýanyshymen bólisken Davıd Degtárov.
Aıta keteıik, Tokıoda ótip jatqan Paralımpıdada aqmolalyq parapaýerlıfter Davıd Degtárev Qazaqstan qorjynyna alǵashqy altyn medaldy salǵan bolatyn.