Paralımpıadashylar eńbegi elendi
Qazaqstan Respýblıkasynyń Prezıdenti Qasym-Jomart Toqaevtyń Jarlyǵymen Davıd Degtárev III dárejeli «Barys» ordenimen, Zarına Baıbatına, Temirjan Dáýlet, Ánýar Sarıevter «Parasat» ordenimen, Nurdáýlet Jumaǵalı «Qurmet» ordenimen marapattaldy, dep habarlaıdy Almaty-akshamy.kz.
QR Memlekettik hatshysy Qyrymbek Kósherbaev Japonıa astanasy Tokıoda ótken XVI jazǵy Paralımpıada oıyndaryna qatysqan sportshylarmen kezdesip olarǵa memlekettik nagradalary men qarjylaı sertıfıkattaryn tabystady.
«Keshe ǵana tórtkúl dúnıe eren erik-jigerdiń, temirdeı tózimniń, ómirge qushtarlyqtyń kýási boldy. Jaratqan adamnyń múmkindigin shektegenimen, nıetin shektemeıtinin kózimizben kórdik. Tokıoda ótken Paralımpıada oıyndarynda taǵdyrdan teperish kórgen jandardyń erligine jer júzi tik turyp qurmet kórsetti. Olaı bolýy zańdylyq edi. Óıtkeni olar tepse temir úzetin, on eki múshesi din-aman, deni saý keı adamdar jete almaǵan jetistikke jetip, belesti baǵyndyryp, jeńis týyn jelbiretti. Rasynda, bul qandaı qurmetke de, qoshmetke de laıyq áreket», – dedi Qyrymbek Eleýuly.
Sonymen qatar Tokıo Paralımpıadasy elimiz úshin asa tabysty bolǵanyn, dúbirli dodada qazaqstandyq sportshylar 5 medal ıelenip, elimiz úshin rekordtyq kórsetkish ornatqanyn atap ótti. Qyrymbek Kósherbaev is-shara barysynda altyn medal alǵan Davıd Degtárevke 106 mıllıon teńge, kúmis medalge ıe bolǵan Zarına Baıbatına, Temirjan Dáýlet, Ánýar Sarıevterge 63 mıllıon teńge, qola júldeger atanǵan Nurdáýlet Jumaǵalıge 31 mıllıon teńge qarjylaı syıaqy tabystady. Saltanatty is-sharaǵa Premer-Mınıstrdiń orynbasary Eraly Toǵjanov, Mádenıet jáne sport mınıstri Aqtoty Raıymqulova qatysty. Jıyn sońynda Qazaqstan sportshylarynyń atynan Davıd Degtárev pen Temirjan Dáýlet sóz sóılep, Memleket basshysyna alǵys aıtty.